«Երբեմն ավելի լավ է թողնել, որ երկու երեխաները կռվեն, ապա՝ բաժանել»․ Թրամփը՝ ՌԴ-ի և Ուկրաինայի մասին

ԱՄՆ նախագահ Դոնալդ Թրամփը Գերմանիայի կանցլեր Ֆրիդրիխ Մերցի հետ հանդիպման ժամանակ Ուկրաինայի և Ռուսաստանի միջև պատերազմը համեմատել է «երկու երեխաների կռվի» հետ։ Այս մասին հաղորդում է The Guardian-ը։

«Երբեմն տեսնում ես երկու փոքրիկ երեխաների, որոնք խելագարի պես կռվում են։ Նրանք ատում են միմյանց և կռվում են այգում, դու փորձում ես բաժանել նրանց, բայց նրանք չեն ուզում բաժանվել։ Երբեմն ավելի լավ է թողնել, որ նրանք որոշ ժամանակ կռվեն, ապա՝ բաժանել», - ասել է Թրամփը՝ նշելով, որ այս համեմատությունը նա արել է նաև Պուտինի հետ հեռախոսազրույցի ժամանակ։

Սպիտակ տան ղեկավարը հավելել է, որ ինքը կցանկանար անհապաղ խաղաղություն Ուկրաինայում, բայց «այժմ այդ խաղաղությունը գոյություն չունի»։

Բացի այդ, Թրամփը լրագրողներին հայտնել է, որ խնդրել է Ռուսաստանի նախագահին չհարվածել Ուկրաինային՝ ռուսական ռազմական օդանավակայանների վրա հարձակմանն ի պատասխան։

«Պուտինը հստակեցրել է՝ «Մենք այլընտրանք չունենք, քան հարձակվելը՝ հաշվի առնելով տեղի ունեցածը»։ Եվ դա, հավանաբար, գեղեցիկ չի լինի։ Ինձ դա դուր չի գալիս։ Ես ասացի՝ պետք է դադարեցնեք դա», - Պուտինի հետ իր երկխոսության մասին պատմել է Թրամփը։