Ուկրաինայի հարձակումը ռուսական օդանավակայանների վրա հնարավոր չէր լինի առանց ԱՄՆ-ի հետախուզության. Le Monde

Ուկրաինան չէր կարողանա անօդաչու սարքերի միջոցով լայնածավալ հարձակում իրականացնել ռուսական օդանավակայանների վրա՝ առանց ԱՄՆ-ի հետախուզության տեղեկատվության։ Այս մասին հայտարարել է ֆրանսիական բանակի նախկին բարձրաստիճան սպա Գիյոմ Անսելը։

«Սա հնարավոր է և պատկերացնելի միայն արբանյակային կապի աջակցությամբ։ Ուկրաինացիները նման համակարգեր չունեն, և եթե նրանք կարողանային հեռակա գործել, ապա, իհարկե, շնորհիվ Միացյալ Նահանգների»,- Le Monde-ին ասել է Անսելը։

Խոսքը Մուրմանսկի, Իրկուտսկի, Իվանովոյի, Ռյազանի և Ամուրի մարզերի օդանավակայանների վրա Ուկրաինայի զինված ուժերի կողմից FPV անօդաչու սարքերի միջոցով հարձակումների մասին է։

CNN-ը հունիսի 2-ին, հղում անելով աղբյուրներին, գրել է, որ ԱՄՆ-ի պաշտպանության նախարար Փիթ Հեգսեթը տեղյակ է եղել Ուկրաինայի զինված ուժերի կողմից ռուսական օբյեկտների վրա հարձակումների մասին և պարբերաբար ստացել է թարմացված տեղեկատվություն։ Միաժամանակ, աղբյուրի խոսքով, Սպիտակ տան իշխանությունները տեղեկացված չեն եղել այս մասին։