Ռուբիոն և Լավրովը քննարկել են ռուս-ուկրաինական կարգավորումը

ՌԴ ԱԳ նախարար Սերգեյ Լավրովը և ԱՄՆ պետքարտուղար Մարկո Ռուբիոն հեռախոսազրույցի ընթացքում քննարկել են Ռուսաստանի և Ուկրաինայի միջև այսօր Ստամբուլում սպասվող բանակցությունները: Այս մասին հայտնել է Ռուսաստանի արտաքին գործերի նախարարության մամուլի ծառայությունը իր Telegram ալիքում:

«Ս.Վ. Լավրովը և Մ. Ռուբիոն նաև մտքեր են փոխանակել ուկրաինական ճգնաժամի քաղաքական կարգավորման շուրջ տարբեր նախաձեռնությունների, այդ թվում՝ հունիսի 2-ին Ստամբուլում ռուս-ուկրաինական ուղիղ բանակցությունները վերսկսելու վերաբերյալ»,- ասվում է հայտարարության մեջ:

Գերատեսչությունը նրանց զրույցից այլ մանրամասներ չի հայտնել:
Ռուսական պատվիրակությունն արդեն ժամանել է Ստամբուլ, հայտնել են ռուսաստանյան լրատվամիջոցները:

Պատվիրակությունը գլխավորում է նախագահի օգնական Վլադիմիր Մեդինսկին: Ուկրաինական պատվիրակությունը կգլխավորի պաշտպանության նախարար Ռուստեմ Ումերովը:

Թուրքական TRT հեռուստաալիքը, հղում անելով երկրի ԱԳՆ աղբյուրներին, հայտնել է, որ հանդիպումը կսկսվի ժամը 13:00-ին՝ Չիրագանի պալատում: Բանակցությունների ընթացքում կողմերը կքննարկեն հրադադարի վերաբերյալ իրենց հուշագրերի նախագծերը: