«ՀՀ-ի և Ադրբեջանի միջև զինված հակամարտության վտանգը պահպանվում է»․ Ռուբիո

Հայաստանի և Ադրբեջանի միջև զինված հակամարտության իրական վտանգը պահպանվում է, և Վաշինգթոնը փորձում է կանխել այն։ Այս մասին հայտարարել է ԱՄՆ պետքարտուղար Մարկո Ռուբիոն՝ ԱՄՆ Ներկայացուցիչների պալատի արտաքին հարաբերությունների կոմիտեում լսումների ժամանակ։

«Ինչ վերաբերում է Ադրբեջանին, մեր հիմնական ուշադրությունը սևեռված է Ադրբեջանի և Հայաստանի միջև խաղաղության հաստատման վրա։ Այնտեղ առկա է հակամարտության իրական վտանգ, որը մենք փորձում ենք կանխել», - ասել է ԱՄՆ պետքարտուղարը։

Ռուբիոն հավելել է, որ Վաշինգթոնը ոչ միայն փորձում է կանխել հնարավոր հակամարտությունը, այլև զբաղվում է բանտարկյալների և Ադրբեջանում մարդու իրավունքների պաշտպանության հարցերով։

«Իրականությունն այն է, որ մենք ստիպված ենք գործ ունենալ այն երկրների հետ, որոնք շատ դեպքերում իդեալական մոդել չունեն, բայց մենք պետք է գործ ունենանք նրանց հետ մեր ազգային շահերի համար և պետք է կարողանանք հավասարակշռել այդ ամենը՝ մեր ազգային շահերը և դիվանագիտությունը», - ընդգծել է Ռուբիոն։