2025թ․ առաջին եռամսյակում ՀՀ-ում գրանցվել է ՄԻԱՎ-ի 129 դեպք

Ինֆեկցիոն հիվանդությունների ազգային կենտրոնը հայտնում է․ «Ամեն տարի մայիսի 3-րդ կիրակի օրը մենք հիշատակում ենք ՁԻԱՀ-ից մահացած անձանց՝ նպատակ ունենալով ևս մեկ անգամ բարձրաձայնելու կորուստների և կյանքեր փրկելու համար հրատապ քայլեր ձեռնարկելու անհրաժեշտության մասին։

Մենք շարունակում ենք հիշեցնել ամենակարևորը՝ ՄԻԱՎ-ը դատավճիռ չէ, և վաղ հայտնաբերման և հակառետրովիրուսային պատշաճ բուժման դեպքում ՄԻԱՎ ունեցող անձը կարող է ապրել լիարժեք կյանքով՝ այնպես, ինչպես կապրեր ՄԻԱՎ չունենալու դեպքում։
2025թ․ առաջին եռամսյակի ընթացքում գրանցվել է՝
* ՄԻԱՎ վարակի 129 դեպք, որից 99-ը՝ արական (77%), 30-ը՝ իգական (23%) սեռի շրջանում։
* ՁԻԱՀ-ի 44 դեպք, որից 38-ը՝ արական (86%) և 6-ը՝ իգական (14%) սեռի շրջանում:
* Մահվան 14 դեպք, որից 10-ը՝ արական (71%) և 4-ը՝ իգական (29%) սեռի շրջանում:
* Երեխաների շրջանում (0-14 տարեկան) 2 դեպք»։