Իսրայելի ՊՆ-ն Գազայի բնակիչների տարհանման ծրագիր է մշակում

Իսրայելի պաշտպանության նախարարը բանակին հանձնարարել է մշակել ծրագիր, որը Գազայի բնակիչներին թույլ կտա կամավոր լքել անկլավը և մեկնել աշխարհի ցանկացած կետ, հայտնում է նախարարության մամուլի ծառայությունը։

«Ես ողջունում եմ ԱՄՆ նախագահ Դոնալդ Թրամփի համարձակ ծրագիրը: Գազայի բնակիչներին պետք է տրվի ելքի և ներգաղթի ազատություն, ինչպես դա ամբողջ աշխարհում է», - ասվում է նախարարի հայտարարության մեջ:

Նախօրեին Թրամփը հայտարարել էր, որ ԱՄՆ-ն վերահսկողության տակ է առնելու Գազայի հատվածը և ստանձնելու է տարածաշրջանում վերականգնողական աշխատանքների համար պատասխանատվությունը։ Միաժամանակ նա Գազայի ներկայիս հատվածն անվանել է քանդման ենթակա վայր և հայտարարել, որ նրա բնակիչները պետք է ընդմիշտ մեկնեն այլ երկրներ՝ որպես բնակության վայրեր առաջարկելով, մասնավորապես, Հորդանանը կամ Եգիպտոսը։