«Անզեն աչքով տեսանելի է, որ ավտոմեքենան ԱՆ բարձրաստիճան պաշտոնյայի համար է». Ծաղիկ Վարդանյան

«Առողջության իրավունք» ՀԿ համահիմնադիր Ծաղիկ Վարդանյանի ֆեյսբուքյան գրառումը․ «Բոլորս ականատես էինք, թե ինչպես ՀՀ վարչապետը անձամբ ցուցակից ջնջում՝ կրճատում էր բարձրաստիճան պաշտոնյաների ծառայողական մեքենաները: Դրան հաջորդեց մի քանի համայնքապետերի, ՏԻՄ պաշտոնյաների հրապրակային հայտարարություններ, թե ինքնուրույն հետևում են վարչապետի հորդորին և հրաժարվում ծառայողական մեքենաներից:
Իհարկե՛, ծառայողական մեքենաները հավանաբար կդրվեն աճուրդի կամ դրանց համար այլ օգտագործման ձև կգտնեն:
Հիմա շատ հետաքրքիր մի դիտարկում. 2025 թվականի պետական բյուջեի «Առողջապահություն» բաժինը չմշակված էր, ցուցանիշները համարյա կրկնված 2024թ-ից: Առաջին հայացքից որևէ նոր մոտեցում, ծառայություն, ծրագիր չկար: Բայց երբ խորքային ուսումնասիրում ես 2025 թվականի պետական բյուջեի կատարումն ապահովող միջոցառումները, ստացվում է, որ ամենևին էլ այդպես չէ: Գլոբալ հիմնադրամի աջակցությամբ, որը դրամաշնորհային ծրագիր է և նրա նպատակը Հայաստանում տուբերկուլյոզի և ՄԻԱՎ/ՁԻԱՀ-ի դեմ պայքարին աջակցելն է, գնվում է «ծառայողական ավտոմեքենա»:
1053 - 32004 միջոցառման «Գլոբալ հիմնադրամի աջակցությամբ իրականացվող «ՀՀ-ում տուբերկուլյոզի և ՄԻԱՎ/ՁԻԱՀ-ի ծրագրերի հզորացում» դրամաշնորհային ծրագրի շրջանակներում ՀՀ առողջապահության նախարարություն կառավարիչները չեն «մոռացել», և իրենց ենթակայության ԲԿ-ներից մեկի համար ծառայողական ավտոմեքենա են ձեռքբերում: Իսկ չէ՞ր ստացվի, որ «կրճատվող» ավտոմեքենաներից մեկը տրամադրեին այդ կազմակերպությանը («Ինֆեկցիոն հիվանդությունների ազգային կենտրոն» ՓԲԸ կամ «Թոքաբանության ազգային կենտրոն» ՓԲԸ, կամ «Ս. Գրիգոր Լուսավորիչ» բժշկական կենտրոն ՓԲԸ ), թե՞ անպայման թարմ ավտոմեքենա պետք է լինի:
Անզեն աչքով տեսանելի է, որ այդ ավտոմեքենան ԱՆ բարձրաստիճան պաշտոնյաներից մեկի համար է, մոտավորապես գուշակում եմ, բայց կոռեկտությունից ելնելով չեմ բարձրաձայնում:
Հ.Գ. Այդպիսի արատավոր պրակտիկա կար, երբ ԱՆ պաշտոնյաները օգտագործում էին ՀՀ ԱՆ ենթակայության կազմակերպությունների ավտոմեքենաները և ոչ միայն...
Փաստորեն հմտորեն կրկնվում է: Նիկոլ Փաշինյան, հիմա իրականում կրճատվում են ծառայողական ավտոմեքենաները, թե՞...»: