«Տուն ու տեղը կորցրած արցախցու համար ի՞նչ տարբերություն՝ փուլային, Քի Վեսթ կամ Մադրիդ»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Փուլային, Փաթեթային, Ընդհանուր պետություն, Մեղրի, Քի Վեսթ, Կազան, Մադրիդ, Նորացված Մադրիդ և նմանօրինակ փաստաթղթերի շուրջ օրվա քննարկումները արժեք չունեն, քանի որ դրանց մասին առավելապես խոսում են քաղաքական գործիչներն ու դիվանագետները, ովքեր փորձում են արդարացնել իրենց անցյալը կամ հարվածել իրենց ընդդիմախոսներին:
Մի կողմ եմ թողնում, որ նրանք մանիպուլացնում են շարքային քաղաքացիներին, ովքեր այդքան գիտելիքներ չունեն և ոչ էլ ինստիտուցիոնալ հիշողություն՝ միմյանց հետ համեմատելու, օրինակ, Լևոն Տեր-Պետրոսյանի «պարտվողական» փուլայինը և Վարդան Օսկանյանի «հաղթական» Մադրիդը:
Լավ կլինի նաև, որ քարոզիչները կարդան, թե իրենց իսկ նախորդ հարցազրույցներում և գրություններում ինչպես են ներկայացրել տվյալ փաստաթուղթը, այլապես զվարճալի հակասություններ են ստեղծվում, այսօր մի բան են պնդում, տասը տարի առաջ բոլորովին այլ բան:
Եվ ամենագլխավորը՝ տուն ու տեղը կորցրած արցախցու համար ի՞նչ տարբերություն՝ փուլային, Քի Վեսթ կամ Մադրիդ:
Ուշացել ենք, պարոնայք, ուշացել ենք...
Երբ հնարավոր էր ուղիղ խոսել ադրբեջանցու հետ, Դուք մերժում էիք Սոֆիա կամ այլ մայրաքաղաք գնալ, թեկուզ՝ Բաքու:
Ի վերջո, համաձայնվեցիք Եվլախի տարբերակին:
Ու հետևաբար, ի՜նչ տարբերություն՝ Մադրիդ կամ Եվլախ:
Թողեք այս ժողովուրդը մղկտա իր ցավերի մեջ»: