Հայտնաբերվել է պատմական Կապանի արքայական պալատը, որտեղից կառավարվել է քաղաքը

Մոտ մեկ ամիս և ավելի տևած պեղումների արդյունքում պատմական Կապան քաղաքի միջնաբերդում հնագետներին հաջողվել է բացահայտել Սյունյաց թագավարության արքայական պալատը՝ իր մի շարք օժանդակ շինություններով։ Հինգ սենյակից և արքայական դահլիճից բաղկացած ապարանքը շրջապատված է եղել բավականին հաստ պարսպաշարով, որոնք, սակայն, մեզ են հասել մեծ ճաքերով։ Մինչև վերջերս այս ապարանքը թվագրվում էր 17-րդ դարով, սակայն հնագիտական պեղումները ցույց տվեցին, որ հողի հաստ շերտի տակ թաքնված են ավելի հին պատմական շերտեր, որոնք հասնում են մինչև 10-րդ դար։ Պեղումների արդյունքում բացահայտվել են մի շարք արժեքավոր գտածոներ, այդ թվում ջնարակապատ խեցեղեն, ինչը նույնպես վկայում է այն մասին, որ ապարանքը կառուցվել է 10-13-րդ դարում՝ Սյունյաց թագավորության օրոք։
Պատմական Կապանը Սյունիքի թագավորության մայրաքաղաքն էր:

Սյունիքի թագավորությունը հիմնադրվել է 987 թվականին՝ սյունյաց գահերեց իշխան Սմբատի կողմից: Հետագա դարերում թագավորությունը սկսում է ծաղկում ապրել:
Սյունիքի թագավորության մեջ կային 43 բերդ, 48 վանք և 1000-ից ավելի գյուղեր։ Մայրաքաղաքը սկզբնական շրջանում Շաղատ գյուղաքաղաքն էր, իսկ 10-րդ դարի վերջերից՝ Կապան քաղաքը։

Ապարանքի պեղումները կվերսկսվեն հաջորդ տարվա գարնանից:

Լուսանկարների հեղինակ Լևոն Մկրտչյան