Պեղվում են Դվինի «Բուրգն» ու Տիկնունի ամրոցը

Այս օրերին հնագիտական պեղումներ են իրականացվում Արարատի մարզի Գետազատ գյուղի հարևանությամբ գտնվող Դվինի «բուրգ» անունը ստացած բլրի և Տիկնունի ամրոցի տարածքներում: Պեղումների ընթացքում ուսումնասիրվում են բլրի գագաթին գտնվող դամբարանը և Տիկնունի ամրոցը, որը տեղացիներն անվանում են «Թագավորի թախտ»:
Տիկնունի ամրոց-ապարանքը պատկանում էր Արշակունի թագավորներին: Կառուցվել է 4-րդ դարում, օգտագործվել է մինչև 17-րդ դար: Այն ծառայում էր՝ որպես ամառանոց պալատական տիկնանց համար:

Տիկնունի ամրոց-ապարանքի մասին հիշատակում է հայ պատմիչ Փավստոս Բուզանդը՝ իր «Պատմություն Հայոց» երկում, որտեղ նկարագրում է Մեծ Հայքի արքա Խոսրով Բ Կոտակի կողմից Խոսրովի անտառը հիմնելու և հարակից պալատական ապարանքները կառուցելու մասին։
Վերջին պեղումների ժամանակ այստեղ հայտնաբերված 13-14-րդ դարերի նյութական մշակույթի արժեքների մեջ կան ջնարակած խեցեղեն և հախճապակի:

Իսկ ինչ վերաբերում է բրգաձև բլրին, ապա մասնագետների կարծիքով՝ բլուրը բնական գոյացություն է, իսկ գագաթին եղած կառույցը, որը դեռևս չի պեղվել, 13-14-րդ դարերի իսլամական դամբարան է։

Բրգաձև բլրի գագաթին առկա են շինության հետքեր, որոնք բացվել են Գետազատ գյուղի բնակիչների կողմից։

Լուսանկարները՝ Համլետ Պետրոսյանի ֆեյսբուքյան էջից: