«Թմրամիջոց օգտագործելու պատճառով 47 ոստիկան է հեռացվել համակարգից». Վահե Ղազարյան

Որքան էլ փորձենք հիմնավորել, որ հանցավորության պատկերը մեղմ է, թվերի նվազում ունենք, այդուհանդերձ պատկերն այդպիսին չէ. այս մասին Հայաստանում 2019-2024թթ. հանցավորության վիճակի, բարեփոխումների արդյունքների վերաբերյալ խորհրդարանական լսումների ժամանակ նշեց ԱԺ «Հայաստան» խմբակցության պատգամավոր Ագնեսա Խամոյանը:
Դիմելով ՀՀ ներքին գործերի նախարար Վահե Ղազարյանին՝ Խամոյանն ընդգծեց. «Թմրանյութերի շրջանառության հետ կապված՝ 2-3 տարի է՝ լսում ենք, որ թելեգրամյան ալիքներով, նաև փոխանցման մեխանիզմներով, թմրանյութը տեղադրողի և դա վերցնողի միջև ֆիզիկական կապի բացակայության պատճառով այդ հանցագործությունները դժվար է բացահայտել, բայց այս 2-3 տարիների ընթացքում չենք տեսնում արմատական փոփոխություններ, քայլեր և ռազմավարություն՝ այդ ամենի դեմ պայքարելու համար: Մենք ունենք թղթի վրա ռազմավարություն: Ինչո՞ւ է այս պատկերը»:

Պատգամավորը նաև նշեց, որ կառավարությունը բացասական կարծիք է հայտնել իր կողմից ներկայացված օրենսդրական նախաձեռնությանը, որով առաջարկվում է իրավական բլոկի ներկայացուցիչներին՝ տարեկան երկու անգամ թմրանյութի թեստ հանձնել: «Ինչո՞ւ պարեկը կամ դպրոցի տարածքներում ծառայություն իրականացնող ոստիկանը գոնե մեկ անգամ չպիտի հանձնեն թմրանյութի թեստ»,- հարցրեց պատգամավորը:

Վահե Ղազարյանը պատասխանեց. «Հիմա մենք սկսել ենք ոստիկանության ծառայողների ատեստացիա և ցանկացած ոստիկան պարտադիր պետք է անցնի թմրամիջոցների օգտագործման հետ կապված թեստը: 47 դեպք ունենք. թմրամիջոց օգտագործելու պատճառով համակարգից հեռացրել ենք 47 ոստիկանի»: