«Ռուսաստանն իր գործընկերներին երբեք չի դրել «մեզ հետ կամ մեր դեմ» երկընտրանքի առաջ». Զախարովա

Ռուսաստանն իր բարեկամներին, դաշնակիցներին, գործընկերներին երբեք չի դրել «մեզ հետ կամ մեր դեմ» երկընտրանքի առաջ, ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ անդրադառնալով Հայաստան-ԱՄՆ ռազմավարական երկխոսությանը։

«Մենք նման խնդիր չենք դրել. դա հակասում է մեր հիմնարար սկզբունքներին: Դա Արևմուտքի գործելաոճն է, որն ամբողջությամբ արհամարհում է նրանց շահերը, մտահոգությունները, որոնց հետ ռազմավարական երկխոսություն է հաստատում: Դրա դասական օրինակն Ուկրաինան է»,- ասել է ՌԴ ԱԳՆ խոսնակը:

«Արդյոք հայ ժողովուրդը գիտակցո՞ւմ է, որ գործընկերությունը գործնականում չի նշանակում պաշտպանության, խնամատարության, օգնության ցուցաբերում, առավել ևս՝ հայտարարված ծավալի աջակցություն»,- հարցրել է Զախարովան։ Նրա խոսքով՝ ակնհայտ է, որ այդ մեխանիզմի իրական իմաստը տվյալ երկիրը ԱՄՆ-ի արտաքին կառավարման ներքո տեղափոխելն է։