«Սպիտակ տունը մտահոգված չէ Գազայի ծրագրի վերաբերյալ Նեթանյահուի հայտարարություններով»․ #Axios

Սպիտակ տունը մտահոգված չէ Գազայի ծրագրի վերաբերյալ Իսրայելի վարչապետ Բենիամին Նեթանյահուի հայտարարությամբ և այն դիտարկում է որպես Իսրայելում նախընտրական շրջանի մաս։ Այս մասին X սոցիալական ցանցում գրել է Axios-ի լրագրող Բարակ Ռավիդը՝ հղում կատարելով ամերիկացի բարձրաստիճան պաշտոնյայի։

«Մենք հասկանում ենք Բիբիի քաղաքական կարիքները։ Մենք դեմ չենք, քանի դեռ նա շարունակում է անել այն, ինչ մենք խնդրում ենք, հատկապես Գազայի ուղղությամբ հարվածների սահմանափակման հարցում»,- Ռավիդը մեջբերում է ամերիկացի պաշտոնյայի խոսքերը։

Պաշտոնյայի խոսքով՝ անցած շաբաթ Նեթանյահուն հեռախոսազրույց է ունեցել նախագահ Թրամփի հատուկ բանագնաց Ջարեդ Քուշների հետ և, չնայած իր թերահավատությանը, խոստացել է հնարավորություն տալ 15 կետից բաղկացած ծրագրին, ինչպես նաև սահմանափակել Գազայի ուղղությամբ հարվածները, որպեսզի հնարավոր լինի սկսել ապառազմականացման գործընթացը։

Նախօրեին Նեթանյահուն հայտարարել է, որ Իսրայելը մերժում է Գազայի հատվածի վերաբերյալ «Խաղաղության խորհրդի» 15 կետից բաղկացած ծրագիրը, իսկ Իսրայելի զինվորականները չեն լքի անկլավը, քանի դեռ «ՀԱՄԱՍ» շարժումն ամբողջությամբ չի զինաթափվել։ New York Times-ի հաղորդմամբ՝ ԱՄՆ նախագահ Դոնալդ Թրամփի նախաձեռնությամբ ստեղծված «Խաղաղության խորհրդի» ներկայացուցիչները կարծում են, որ Իսրայելը, չնայած ծրագրի մերժմանը, պատրաստ է Խորհրդի հետ համագործակցության։