Իրանի առաջնորդ Սեյեդ Մոջթաբա Խամենեիի ուղերձը հարևան երկրներին

Իրանի գերագույն առաջնորդ Մոջթաբա Խամենեին կոչ է արել Իրանի հարևան երկրներին հստակորեն արտահայտել իրենց դիրքորոշումն այն պետությունների վերաբերյալ, որոնց Թեհրանը համարում է ագրեսորներ: Իրանը ցամաքային կամ ծովային սահմաններ ունի 15 երկրների հետ և ձգտում է պահպանել «ջերմ և կառուցողական հարաբերություններ» նրանց հետ: Սակայն, ըստ Իմամ Խամենեիի, այդ երկրներից մի քանիսը տարիներ շարունակ թույլ են տվել իրենց տարածքում ռազմական և ֆինանսական բազաներ ստեղծել, որոնք նախատեսված էին տարածաշրջանում ամերիկյան ազդեցությունն ապահովելու համար:
«Այս երկրները պետք է հստակորեն սահմանեն իրենց դիրքորոշումը մեր սիրելի հայրենիքի դեմ ագրեսորների և մեր քաղաքացիներին սպանողների նկատմամբ»,- ասել է նա: Խամենեին նաև կոչ է արել անհապաղ փակել նման բազաները՝ պնդելով, որ ԱՄՆ-ն օգտագործում է անվտանգության և խաղաղության մասին հռետորաբանությունը՝ իր իրական նպատակները թաքցնելու համար: