5-6 տարեկան երեխայի զգեստ, որը պահպանվել է գրեթե մեկ հազարամյակ

1908 թվականին, երբ Անի քաղաքում իրականացվում էին հնագիտական ակտիվ պեղումներ, քաղաքի մոտ գտնվող Ծաղկոցաձորում, անեցի մեծահարուստ Տիգրան Հոնենցի գերդաստանին պատկանող քարայրային դամբարանից հայտնաբերվել է 5-6 տարեկան երեխայի վերնազգեստ: Մասնագետները զգեստը թվագրում են 12-13-րդ դարերով:
Հագուստը թանձր միագույն մետաքսից է, օձիքը և թեզանիքները զարդարված են ոսկեթել ասեղնագործությամբ։

Անիից հայտնաբերված վուշե, մետաքսե, բաբակյա և այլ գործվածքներից կարված զգեստների, սփռոցների, կապերտների բացառիկ օրինակները վկայում են այն մասին, որ Անին եղել է մանածագործության և ջուլհակության խոշոր կենտրոն:

Վերնազգեստը ցուցադրվում է Հայաստանի պատմության թանգարանի՝ «Անի․ Բագրատունիների տիեզերահռչակ մայրաքաղաք» ցուցասրահում։