«Խոսքս ուղղում եմ հարյուրհազարավոր անտարբերներին». Ավետիք Իշխանյան
185
Կիրակի, 16 հունիսի, 2024 թ., 22:30
Իրավապաշտպան Ավետիք Իշխանյանի ֆեյսբուքյան գրառումը. «ԿՈՉ ԱՆՏԱՐԲԵՐՆԵՐԻՆ Բազմիցս ասել եմ և հիմա կրկնում եմ՝ ստալինյան ժամանակներից ի վեր, Հայաստանում երբեք նման քաղաքական հետապնդումներ և այսքան քաղբանտարկյալներ չեն եղել։ Վերջին շրջանում, հատկապես բռնություններն ու քաղաքական հետապնդումները սաստկացել են։ Հետապնդվում, ձերբակալվում են ոչ միայն հունիսի 12-ի հանրավաքի մասնակիցները, ՀՅԴ անդամները, այլև այն մարդիկ, ովքեր համակրում են շարժմանը, օրինակ՝ GG սեփականատերը։ Այլևս անիմաստ է դիմել անհայրենիք, նյութապաշտ քպ-ականներին, ծախված, բթամիտ ոստիկաններին, նույնպես ծախված քննիչներին, դատախազ-դատավորներին։ Խոսքս ուղղում եմ հարյուր հազարավոր անտարբերներին․ -Ինչ, ձեզ թվում է, որ այն ինչ կատարվում է Հայաստանում, ձեզ չի՞ վերաբերում։ Այդպես էր թվում Կիրանցի բնակիչներին, որ Արցախի հարցն իրենց չի վերաբերում։ Նույնը՝ քաղաքական հետապնդումների հարցով։ Համոզված եղիր, եթե շարունակես անտարբեր մնալ և լռել, վաղը կհանձնեն ձեր պապենական տարածքները, կձերբակալեն քե՛զ, քո հարազատներին։ Դու՛, քո անտարբերությամբ, խրախուսում ես և հայրենիքի վաճառքը և քաղաքական հետապնդումները։ Հիշեցի գերմանացի պաստոր Մարտին Նիմյոլերի խոսքերը․ «Սկզբում նրանք եկան սոցիալիստների հետևից, և ես լռեցի, որովհետև ես սոցիալիստ չէի։ Այնուհետև նրանք եկան արհմիության անդամների հետևից, և ես լռեցի, քանի որ ես արհմիության անդամ չէի։ Այնուհետև նրանք եկան հրեաների հետևից, և ես լռեցի, քանի որ ես հրեա չէի։ Այնուհետև նրանք եկան իմ հետևից, և ոչ ոք չէր մնացել, որ խոսեր ինձ համար»»։