Ուկրաինան շուտով արկեր կստանա Չեխիայից

Չեխիայի նախաձեռնությամբ երրորդ երկրներից գնված 155 մմ տրամաչափի հրետանային արկերի առաջին խմբաքանակն Ուկրաինա կհասնի մի քանի շաբաթվա ընթացքում, Bloomberg-ին հայտնել է Չեխիայի պաշտպանության նախարարության խոսնակ Յան Իրեսը։
Նրա խոսքով՝ Ուկրաինայի զինված ուժերի համար զինամթերքի գնմամբ զբաղվում են եվրոպական մի քանի երկրներ, սակայն նա չի հստակեցրել, թե որոնք։ Ժիրեսը չի հայտնել նաև, թե ում պաշարներից են լինելու մատակարարումները՝ նշելով, որ այդ տեղեկությունը կհրապարակվի արկերի՝ Ուկրաինա ժամանելուց հետո։

Փետրվարին Չեխիայի նախագահ Պետր Պավելը Մյունխենի անվտանգության համաժողովում հայտարարեց, որ հանրապետությունը հայտնաբերել է 500 հազար 155 մմ արկ և 300 հազար 122 մմ արկ, որոնք կարող են փոխանցվել Ուկրաինայի զինված ուժերին մի քանի շաբաթվա ընթացքում, եթե դաշնակիցները միջոցներ հատկացնեն դրա համար։ Financial Times-ի տվյալներով՝ ԵՄ-ն այժմ շտապ 1,5 միլիարդ դոլար է փնտրում այդ նպատակով:

Նիդերլանդները միացել է նախաձեռնությանը և համաձայնել է տրամադրել 100 միլիոն եվրո, Բելգիան խոստացել է հատկացնել 200 միլիոն եվրո, Կանադան հայտարարել է 22 միլիոն դոլար տրամադրելու պատրաստակամության մասին, հաղորդում է CBC News-ը։ Բացի այդ, Չեխիայի առաջարկին աջակցել են Դանիան, Մեծ Բրիտանիան և Շվեդիան։

Der Spiegel-ի աղբյուրները պնդում էին, որ Գերմանիան, որը գաղտնի քննարկումներ է անցկացնում Հնդկաստանի հետ, նույնպես մասնակցում է Ուկրաինայի համար արկերի գնմանը։ Ենթադրվում էր, որ վերջինս ունի «հարյուր հազարավոր» հրանոթներ և կարող է դրանք վաճառել միջնորդների միջոցով՝ Ռուսաստանի հետ հարաբերությունները չփչացնելու համար։ Նմանատիպ գործարքներ կարող են կնքվել արաբական երկրների, աֆրիկյան և բալկանյան երկրների հետ։ Politico-ի աղբյուրները հավանական մատակարարների թվում նշել են նաև Հարավային Կորեան, Թուրքիան և Հարավային Աֆրիկան:

Արևմտյան հետախուզական գործակալությունները գնահատում են, որ Ուկրաինան կսպառի արկերի իր պաշարները մինչև հունիս կամ նույնիսկ ավելի վաղ։ ԱՄՆ-ի ռազմական օգնության դադարեցման պատճառով, որն աշնանից չի կարողանում համաձայնության գալ Կիևի համար 61,4 միլիարդ դոլարի փաթեթի շուրջ, ուկրաինական բանակը սկսեց հրետանու «սուր դեֆիցիտ» զգալ և մարտադաշտում սկսեց զինամթերք խնայել։ Ուկրաինական զինված ուժերը ռուսական կողմի տասը կրակոցին կարող են պատասխանել միայն մեկով. նախագահ Վլադիմիր Զելենսկին նախազգուշացրել է, որ առանց Արևմուտքի աջակցության ուկրաինացի զինվորականներն ստիպված կլինեն նահանջել։

Ռազմական հաշվարկների համաձայն, Ուկրաինային ամսական 200 հազար արկ է անհրաժեշտ, որպեսզի լիարժեք կռվի և կարողանա դիմակայել Ռուսաստանին։ Սա օրական մոտ 6,7 հազար կրակոց է։

Մինչդեռ վերջին վեց ամիսների ընթացքում Ռուսաստանը Հյուսիսային Կորեայից ստացել է 3 միլիոն հրանոթային արկ, ասել է Հարավային Կորեայի պաշտպանության նախարարության ղեկավար Շին Վոն Սիկը։ Մարտի 1-ին հայտնի դարձավ, որ մատակարարումները կանգ են առել։