Արցախում տապալված Դաշուշենի Խաչը 16 մետր էր զիջում աշխարհի ամենաբարձր խաչին

Երեկ տեսանյութ տարածվեց այն մասին, թե ինչպես են ադրբեջանցիները տապալում բռնազավթված Արցախի Դաշուշեն գյուղի մոտակա բլուրին տեղադրված մեծ խաչը։ Խաչը տեղադրվել էր 2017 թվականին՝ ի հիշատակ Արցախի ազատագրման և պաշտպանության համար զոհված զինծառայողների։

Դաշուշենի խաչը 50 մետր էր և կշռում էր 17 տոննա։ Երեկոյան ժամերին լուսավորված խաչը երևում էր Ստեփանակերտի բոլոր անկյուններից։

Ի դեպ, այս խաչն իր բարձրությամբ երկրորդն էր աշխարհում Մակեդոնիայի մայրաքաղաք Սկոպյեում տեղադրված խաչից հետո։ Մակեդոնիայի խաչը կրում է «Հազարամյակի խաչ» անունը և տեղադրվել է 2002 թվականին։

Այն այժմ Մակեդոնիայի ամենանշանավոր հուշարձաններից է։ Հուշահամալիրը նվիրված է Մակեդոնիայի կողմից քրիստոնեության ընդունման երկուհազարամյակին: Մակեդոնական խաչի բարձրությունը 66 մետր է: Դաշուշենի խաչը 16 մետր էր զիջում Մակեդոնիայի խաչին։