Օծանելիքի խանութի վերածված Արգիշտի սրճարանը

1970-ական թվականներին Երևանի կենտրոնում՝ Լենինի պողոտայում գործում էր երևանցիների կողմից շատ սիրված սրճարան, որը կրում էր ուրարտական Արգիշտի արքայի անունը: Արգիշտի սրճարանը նշանավոր էր հատկապես իր համեղ պաղպաղակով, որը վաճառվում էր երկհարկանի սրճարանի առաջին՝ բացօթյա հարկում, իսկ երկրորդ հարկում ռեստորան էր գործում, որտեղ մատուցվում էին համեղ ուտելիքներ:

1970-ականներին, մինչ սրճարանի վերածվելը, այս վայրում գործում էր Երևանի միակ գրավատունը:
Այսօր արդեն Մաշտոցի անունը կրող պողոտայում սրճարանի տեղում օծանելիքի խանութ է գործում և քչերն են նկատել, որ շենքի ճակատային մասում դեռևս պահպանվել է Արգիշտի գրությունը:

Իսկ անկյունում՝ կամարի մոտ տեղադրված է սրճարանի քանդակներից մեկը՝ կնոջ տեսքով կարեատիդը, որի հեղինակները նշանավոր քանդակագործներ Դավիթ Երևանցին և Հմայակ Բդեյանն են:

Հմայակ Բդեյանը նաև սրճարանի ներսի կերամիկական քանդակի հեղինակն է եղել: Սրճարանի ձևավորման ժամանակ փորձել են կիրառել ուրարտական արվեստին հատուկ որոշ տարեր, այստեղ կարելի էր տեսնել ուրարտական դեկորատիվ վահաններ, թրեր և մարտակառքերի պատկերներ, քանդակներ։ 90-ականներին սրճարանը մի քանի անգամ փոխել է իր նշանակությունը՝ վերածվելով տեսասրահի, գարեջրատան, խաղատան, խանութի և այլն, այսօր սրճարանի տեղում օծանելիքի մեծ խանութ է գործում։ Թեև սրճարանն արդեն մոտ 30 տարի է չկա, սակայն շենքի ճակատին դեռ կախված անվանումն ու անկյունում կանգուն մնացած կնոջ քանդակը ջերմ հիշողություններ են արթնացնում այն երևանցիների սրտերում, ովքեր 70-ականներին գեթ մեկ անգամ եղել են սրճարանում և համտեսել այստեղ մատուցվող նշանավոր պաղպաղակը: