Թուրքիայի, Ադրբեջանի և 35 այլ երկրների զինված ուժեր կանցկացնեն պատմության ամենամեծ զորավարժությունը

Թուրքիայի զինված ուժերը Էգեյան ծովի տարածաշրջանում կանցկացնեն «Efes 2022» խոշորագույն համատեղ զորավարժությունները, հայտնում է Anadolu-ն։

Զինվորական անձնակազմը 37 երկրներից, այդ թվում՝ Իտալիայից, Ադրբեջանից, Բոսնիա և Հերցեգովինայից, Հյուսիսային Մակեդոնիայից, Պակիստանից, Ալբանիայից, Ղազախստանից, Ղրղզստանից և ԱՄՆ-ից, կվարժեն համատեղ ցամաքային և ծովային գործողությունների, ինչպես նաև դեսանտային հմտություններ։

Զորավարժություններին կմասնակցեն իտալական ֆրեգատ, Լիբիայի ռազմածովային նավատորմ, Չ-53 ուղղաթիռներ, հաուբիցներ, զրահատեխնիկա և ԱՄՆ ԶՈւ դեսանտային նավ և այլ տեխնիկա։
Թուրքիայի ազգային պաշտպանության նախարարության աղբյուրների համաձայն՝ զորավարժությունները կկազմակերպվեն Դողանբեյ պոլիգոնում (Սեֆերիհիսար, Իզմիր) և կավարտվեն Դիտորդների օրով, որը կանցկացվի հունիսի երկրորդ շաբաթում։

Զորավարժություններին կմասնակցեն ավելի քան հազար օտարերկրյա զինծառայողներ աշխարհի 37 երկրներից։

«Efes 2022»-ը Էգեյան ծովի տարածաշրջանում ամենամեծ համատեղ զորավարժությունն է։

Հաշվի առնելով Թուրքիայի զինված ուժերը՝ անձնակազմի թիվը, որը կմասնակցի զորավարժություններին, կհասնի 10 հազար մարդու։

2016 թվականին Էֆեսի զորավարժություններին մասնակցել է 8 երկիր, 2018 թվականին՝ 20 երկիր։ Այս տարվա զորավարժությունները պատմության մեջ ամենամեծն են լինելու, քանի որ մասնակից երկրների թիվը մոտեցել է չորս տասնյակին։

Որպես տիպիկ վարժանքների սցենարի մաս՝ հրետանային կրակի աջակցությամբ տեղի կունենա դեսանտի վայրէջք:

Թիրախները խոցվելու են ցամաքային կրակային աջակցության մեքենաներով, մարտական ​​ինքնաթիռներով և հարվածային ուղղաթիռներով։

Զորավարժությունների շրջանակներում, որոնց ծրագիրը ներառում է նաև հատուկ նշանակության ստորաբաժանումների զորավարժություններ, կցուցադրվեն նավից թիրախներ խոցելու, օդում վառելիքով լիցքավորելու և մարտական ​​որոնողափրկարարական հնարավորությունները։

Սպասվում է, որ զորավարժությունների վերջին օրը կդիտարկեն ավելի քան 20 երկրների պաշտպանության նախարարները, շտաբների պետերը և ուժերի հրամանատարները: