«Վիշգորոդն ամբողջությամբ ազատագրվել է ռուսական զորքերից». Գրուզևիչ

Ուկրաինայի զինված ուժերը ռուսական զորքերից ազատագրել են Կիևի շրջանի Վիշգորոդ քաղաքը։ Այս մասին մարտի 31-ին կայացած ճեպազրույցում ասել է Ուկրաինայի զինված ուժերի ցամաքային զորքերի հրամանատարության շտաբի պետի տեղակալ Ալեքսանդր Գրուզևիչը:

Նա նշել է, որ Ուկրաինայի զինված ուժերն զգալի հաջողությունների են հասել բազմաթիվ ոլորտներում և շարունակում են հարձակողական գործողությունները։ Գրուզևիչը լավ նորություններ է խոստացել առաջիկա օրերին. «Կարծում եմ՝ մոտ ապագայում լավ նորություններ կունենանք, և հավատացեք, որ կլինեն։ Գիտեմ, որ դուք շատ եք անհանգստանում Բուչայի համար, Վիշգորոդի համար... Վիշգորոդն արդեն մերն է, հսկողության տակ։ Առաջիկայում, ինչպես ասացի, շատ ու շատ լավ նորություններ կունենանք։ Կարծում եմ՝ մեկ-երկու օրից մենք կտեսնենք հիանալի պատկեր և ավելի կզարգացնենք մեր հաջողությունը»,- ընդգծել է Գրուզևիչը։

Սակայն բրիգադի գեներալը հորդորեց շատ չթուլանալ, քանի որ ռուսներն ուժ ունեն հակահարված տալու, առաջին հերթին պետք է զգուշանալ հրթիռային հարվածներից։