Ռուս զինվորականները ոչնչացրել են ուկրաինական բանակի պահեստները

Ռուսաստանի զինված ուժերը ոչնչացրել են ուկրաինական մի քանի ռազմական պահեստներ, հայտնել է ՌԴ ՊՆ պաշտոնական ներկայացուցիչ գեներալ-մայոր Իգոր Կոնաշենկովը։

«Մարտի 22-ին Ուկրաինայի ռազմական օբյեկտներում օդային և ծովային գերճշգրիտ հեռահար զինատեսակներ են գործարկվել։ Ոչնչացվել են ուկրաինական զորքերի վառելիքի և քսանյութերի մեծ պահեստները Լիսիչանսկի և Կրամատորսկի բնակավայրերում, հրթիռային և հրետանային զինատեսակների պահեստը Դրուժկովկայում և զինամթերքով պահեստներ Նադեժդինկայում և Նովոալեքսանդրովկայում»,- Կոնաշենկովի խոսքերն է մեջբերում ՏԱՍՍ-ը։

Նրա խոսքով՝ օպերատիվ-մարտավարական և բանակային ավիացիան խոցել է Ուկրաինայի 83 ռազմական թիրախ։ «Դրանց թվում են չորս հրամանատարական կետեր, չորս զենիթահրթիռային համակարգեր, հրթիռային և հրետանային զենքի և զինամթերքի 3 պահեստ, ինչպես նաև ռազմական տեխնիկայի կուտակման 68 կետ»,- հավելել է նա։