ՌԴ ՊՆ-ը հայտարարել է Մելիտոպոլի և Խերսոնի նկատմամբ լիակատար վերահսկողություն սահմանելու մասին

Ռուսաստանը լիակատար վերահսկողություն է սահմանել Ուկրաինայի Մելիտոպոլ և Խերսոն քաղաքների նկատմամբ, իսկ «ուկրաինական զորքերը շարունակում են օգտագործել «լռության ռեժիմը»՝ վերախմբավորվելու և մարտունակությունը վերականգնելու համար»։ Այս մասին ճեպազրույցում հայտարարել է ՌԴ Պաշտպանության ազգային կառավարման կենտրոնի ղեկավար, գեներալ-գնդապետ Միխայիլ Միզինցևը։

Նա հայտարարել է, որ Ռուսաստանի առաջարկած տասը մարդասիրական երթուղիներից ուկրաինական իշխանությունները մինչ օրս համաձայնվել են միայն երեքի հետ, ընդ որում, նրանք չեն համաձայնել դեպի Ռուսաստան ուղղված և ոչ մի մարդասիրական միջանցքի:

Միզինցևը նշել է, որ միևնույն ժամանակ «անհեթեթ են թվում ուկրաինական կողմի խնդրանքները՝ Մելիտոպոլ և Խերսոն հումանիտար օգնություն մատակարարելու վերաբերյալ։

«Եվս մեկ անգամ տեղեկացնում ենք, որ այդ քաղաքները գտնվում են Ռուսաստանի լիակատար վերահսկողության տակ, նրանց բնակչությունը շարունակում է ապրել խաղաղ կյանքով և Ռուսաստանի Դաշնության կողմից ապահովվում է անհրաժեշտ ամեն ինչով։ Այդ բնակավայրերի բնակիչներին օգնություն ցուցաբերելու հետ կապված խնդիրներ չկան»,- ընդգծել է նա։