Ռուսաստանը «լռության ժամ» է հայտարարել Ուկրաինայի քաղաքներից բնակիչների տարհանման համար

Մարտի 8-ին Մոսկվայի ժամանակով ժամը 10:00-ից Ռուսաստանը «լռության ռեժիմ» է հայտարարում Կիևից, Խարկովից, Չեռնիգովից, Սումիից, Մարիուպոլից քաղաքացիական անձանց դուրս հանելու համար, հաղորդում է Ուկրաինայում մարդասիրական արձագանքման միջգերատեսչական համակարգող շտաբը:
Այսպիսով, ռուսական կողմը պատրաստ է տրամադրել հումանիտար միջանցքներ Չեռնիգովից, Կիևից և հարակից բնակավայրերից Բելառուսի տարածքով մինչև Գոմել, այնուհետև օդային տրանսպորտով փոխադրում Ռուսաստան, ուկրաինական կողմի հետ համաձայնությամբ:

Նաև Սումի և Խարկով քաղաքներից միջանցք կբացվի Պոլտավայով դեպի Ռուսաստանի տարածք՝ Բելգորոդ, այնուհետև ավիացիոն, երկաթուղային, ավտոմոբիլային տրանսպորտով դեպի նշանակման վայրեր կամ էլ ժամանակավոր տեղակայման վայրեր, կամ էլ՝ դեպի Լվով, Ուժգորոդ, Իվանո-Ֆրանկիվսկ՝ ուկրաինական կողմի համաձայնությամբ:

Բացի այդ, Ռուսաստանը պատրաստ է մարդասիրական միջանցքներ տրամադրել Մարիուպոլից երկու երթուղիներով դեպի Դոնի Ռոստով՝ Նովոազովսկով և Տագանրոգով, և դեպի Զապորոժիե՝ ուկրաինական կողմի հետ համաձայնությամբ։
Մինչև Մոսկվայի ժամանակով ժամը 03:00-ն ուկրաինական կողմին կառաջարկվի համաձայնեցնել խաղաղ բնակիչների համար ելքի ուղիները և մարդասիրական միջանցքների բացման ժամը։

Նաև Ուկրաինան պետք է գրավոր երաշխիքներ տրամադրի հայտարարված երթուղիների անվտանգությունն ապահովելու համար և մինչև Մոսկվայի ժամանակով ժամը 03:00-ն ԶԼՄ-ներում հրապարակի Գլխավոր շտաբի հրատապ հայտարարությունը մարդասիրական գործողության մանրամասների վերաբերյալ ուկրաիներենով և ռուսերենով. հայտարարությունը հասցնի օտարերկրյա պետությունների դեսպանատների, ՄԱԿ-ի, ԵԱՀԿ-ի, ԿԽՄԿ-ի և այլ միջազգային կազմակերպությունների համապատասխան կառույցներին բոլոր առկա տեղեկատվական ռեսուրսների միջոցով:
Մոսկվայի ժամանակով ժամը 09:30-ից սկսած տարհանման պլանն իրականացնելու համար անհրաժեշտ է կողմերի միջև շարունակական կապ հաստատել տեղեկատվության փոխանակման համար, հավելել են Գլխավոր շտաբից։
Ավելի վաղ հայտնել էինք, որ Բելառուսում ընթացող բանակցություններում Մոսկվայի և Կիևի ներկայացուցիչները պայմանավորվել են մարդասիրական միջանցքների բացման շուրջ։