ԱՄՆ-ը կչեղարկի Իրանի դեմ պատժամիջոցների մի մասը

Վաշինգթոնն առայժմ համաձայնել է չեղարկել Թեհրանի դեմ պատժամիջոցների միայն մի մասը, սակայն ներկայիս պայմանները հիմք են տալիս հույսեր կապել միջուկային գործարքի շուրջ համաձայնագրի հանգուցալուծման վերաբերյալ: Այս մասին հայտարարել է Մեջլիսի (Իրանի խորհրդարան) Ազգային անվտանգության և արտաքին քաղաքականության հանձնաժողովի պաշտոնական ներկայացուցիչ Մահմուդ Աբբասզադե Մեշկինին։

«Բանակցային գործընթացում կան դրական պահեր և առաջընթաց, բայց կան կարևոր հարցեր, որոնք պետք է համաձայնեցվեն: Իհարկե, Իրանն իրավունք ունի չեղարկելու բոլոր պատժամիջոցները, բայց այս պահին հակառակ կողմը համաձայնել է դրանք հանել միայն մասամբ»,- ասել է նա։

Պատգամավորի խոսքով՝ «իրանական կողմի տրամադրության տակ գտնվող փաստերն ու փաստաթղթերը վկայում են այն մասին, որ փոխշահավետ համաձայնագրի կնքման պայմանները պատրաստ են, բայց միայն այն դեպքում, երբ արևմտյան երկրները բարի կամք և հիմնարարություն դրսևորեն»։