«Կգոհացնի՞ պատասխանը՝ լավ, չի՞ գոհացնի՝ կշարունակենք մեր բողոքի ակցիաներն ավելի մեծ թափով». անհայտ կորածների հարազատներ

Հարցին, թե հետագա ի՞նչ գործողություներ են իրականացնելու անհայտ կորած զինծառայողների հարազատները, վերջիններն ասացին, որ առայժմ սպասում են պատասխանի՝ ընդունո՞ւմ է իրենց վարչապետը, թե՞ ոչ:

«Թե ինչ քայլերի կդիմենք, կպատասխանենք վարչապետին հանդիպելուց հետո: Կգոհացնի՞ պատասխանը՝ լավ, չի՞ գոհացնի՝ կշարունակենք մեր բողոքի ակցիաներն ավելի մեծ թափով»:

Մեկնաբանելով անհայտ կորածների հարցերով հանձնաժողով ստեղծելու գաղափարը, զինծառայողների հարազատներից մեկն ասաց. «Էդ հանձնաժողովն ինչո՞ւ չստեղծվեց 9 ամիս առաջ, կամ էդ հանձնաժողովն ի՞նչ է անելու: Նույնիսկ մտածում եմ, որ նման հանձնաժողով կազմելու իմաստ չկա: Ի՞նչ պիտի անի հանձնաժողովը, եթե երկրի ղեկավարը չի կարողանում ոչ մի հարց լուծել: Հանձնաժողովը գնալու է Ադրբեջան՝ բանակցի՞»,- վրդովվեց եղբորորդուն կորցրած քաղաքացին:

Այս պահին Կառավարության դիմաց բողոքի ակցիան շարունակվում է: Անհայտ կորած զինծառայողների հարազատները սպասում են վարչապետի հետ հանդիպմանը: