«Մինչև հունվարի 31-ը դիմելու դեպքում ինքնակամ շինություն ունեցողների համար կգործեն նախկին կադաստրային գները». Բաբկեն Թունյան

ԱԺ-ը երկրորդ ընթերցմամբ և ամբողջությամբ ընդունեց Կառավարության կողմից ներկայացված օրենքի նախագիծ, որով ինքնակամ շինություններն օրինականացնելու համար մինչև այս տարեվերջ դիմածների համար գործում են նախկին կադաստրային արժեքները:

«Այս նախագիծը հնարավորություն է տալիս ինքնակամ շինություններ ունեցող քաղաքացիներին մինչև այս տարվա հունվարի 31-ը իրենց համայնքներին դիմելու և դրական որոշման դեպքում օգտվել նախկին ցածր կադաստրային արժեքներից»,- ընդգծեց «Իմ քայլը» խմբակցության պատգամավոր Բաբկեն Թունյանը:

«Նաև այն քաղաքացիները, որոնք ձեռք են բերել հողամասեր՝ հետագա վճարման պայմանով, 2021 թվականի ընթացքում վճարումները կատարելու դեպքում կօգտվեն նախկին ցածր կադաստրային արժեքներից»,- հավելեց Թունյանը՝ շեշտելով, որ այս հնարավորությունից պետք է օգտվել:

Հիշեցնենք, որ հունվարի 1-ից ուժի մեջ են մտել անշարժ գույքի նոր կադաստրային արժեքները՝ շուկայականին մոտարկված, որոնք մի քանի անգամ ավելի բարձր են, քան նախկինում գործող կադաստրային արժեքները: