Երևան`   +8 °C
Այսօր`   Երեքշաբթի, 17 նոյեմբերի, 2026 թ.

«Ի՞նչ գին է ներկայում առաջարկում «Գազպրոմ»-ը հայկական կողմին». Վահե Դավթյան

793
Երեքշաբթի, 22 դեկտեմբերի, 2020 թ., 10:30
«Ի՞նչ գին է ներկայում առաջարկում «Գազպրոմ»-ը հայկական կողմին». Վահե Դավթյան

«Մեկ Հայաստան» կուսակցության քաղխորհրդի անդամ, էներգետիկ մասնագետ Վահե Դավթյանը ֆեյսբուքյան իր էջում գրել է. «Բաց նամակ ՀՀ փոխվարչապետ Մհեր Գրիգորյանին

Պարո՛ն Գրիգորյան, ինչպես հայտնի է, դեկտեմբերի 17-ին Սանկտ-Պետերբուրգում Դուք հանդիպել եք «Գազպրոմ»-ի նախագահ Ալեքսեյ Միլլերի հետ՝ քննարկելով 2021-ին Հայաստան մատակարարվող բնական գազի գնի հետ կապված հարցերը: Քանի որ գազի գնագոյացումը շարունակում է իր մեջ կարևոր տնտեսական, սոցիալական ու քաղաքական բաղադրիչներ պարունակել՝ ավանդաբար գտնվելով հասարակության ուշադրության կենտրոնում, խնդրում եմ պատասխանել հետևյալ հարցերին.

1. Արդյո՞ք ներկայումս ընթանում են հայ-ռուսական բանակցություններ գազի գնի շուրջ: Եթե այո՛, ապա ո՞ր փուլում են դրանք գտնվում:

2. Ի՞նչ գին է ներկայումս առաջարկում «Գազպրոմ»-ը հայկական կողմին:

3. Որո՞նք են հայկական կողմի «կարմիր գծերը», այլ կերպ ասած՝ հնչեցրե՞լ է արդյոք հայկական կողմն իր համար առավել հարմար գինը: Եթե այո՛, ապա ո՞րն է այդ գինը և ինչ հաշվարկ է դրված դրա հիմքում:

4. Քննարկվե՞լ է արդյոք «Գազպրոմ Արմենիա» ընկերության օպերացիոն ու ֆինանսական գործունեության խնդիրները՝ պայմանավորված դոլարի փոխարժեքի կտրուկ աճով: Հնարավո՞ր է, որ այդ խնդիրների լուծումը կրկին արտահայտվի երկրի ներսում գազի սակագների աճի տեսքով, ինչպես դա եղավ ս.թ. հուլիսին:

Խնդրում եմ հնարավորինս հստակ ու օբյեկտիվորեն պատասխանել այս հարցերին, որոնք ուղիղ կապ ունեն, թե՛ հասարակության բարեկեցության, թե՛ տնտեսական անվտանգության, թե՛ բիզնեսի արդյունավետության հետ»: