Երևան`   +7 °C
Այսօր`   Երեքշաբթի, 17 նոյեմբերի, 2026 թ.

«Կհասկանաք, թե ինչ խայտառակ վիճակում ենք գտնվում մենք»․ ՀԲՃ

445
Հինգշաբթի, 20 օգոստոսի, 2020 թ., 02:10
«Կհասկանաք, թե ինչ խայտառակ վիճակում ենք գտնվում մենք»․ ՀԲՃ

Հայկական բնապահպանական ճակատը գրում է. «Այս փոքրիկ հանքը շահագործվել է Կանդայում 1951-1957թթ-ին, բայց 60 տարի անց էլ հանքի թթվային դրենաժի վտանգավոր ջրերը շարունակում են աղտոտել շրջակայքի գետերը։ Հանքի ռեկուլտիվացիայի վերջնական պլանի համար անհրաժեշտ կլինի 48,7 միլիոն դոլար։ Բացի այդ, տարեկան 1 միլիոն դոլար է նաև անհրաժեշտ ջրերի մաքրման կայանների տեխնիկական սպասարկումն ապահովելու համար։ Դեռ հայտնի չէ, թե այդ գումարներն ով պետք է վճարի, քանի որ պատասխանատու ընկերություն չկա։
Ջուրն այստեղ աղտոտված է թթվային ապարների դրենաժի պատճառով, ինչը տեղի է ունենում այն ​​ժամանակ, երբ հանքի շահագործման արդյունքում բացված ապարներն օքսիդանում են և առաջանում է ծծմբական թթու, որն սկսում է տեղափոխել ծանր ու վտանգավոր մետաղները: Ի թիվս այլ աղտոտիչների, այդ աղտոտված ջուրը ներառում է նաև պղինձ և ցինկ, որոնց պարունակությունները բազմակի գերազանցում են անվտանգ չափանիշները: Այս հանքից արդյունահանել են պղինձ, կապար, ցինկ, արծաթ և ոսկի:
Կանադայի Բրիտանական Կոլումբիա նահանգի բոլոր հանքերի մոտ 2,8 միլիարդ դոլար արժողությամբ վերականգնման ծախսերը հոգալու համար ներկայումս տեղական կառավարությունն ունի միայն 1,6 միլիարդ դոլար պարտատոմսեր:

Սա որպես օրինակ ենք բերում, որ հասկանալի լինի, թե ինչ ծախսեր և ջանքեր են պահանջվում մետաղական հանքերի շահագործումից հետո առաջացած էկոլոգիական խնդիրները վերացնելու համար, եթե դա ընդհանրապես տեխնիկապես հնարավոր է։ Նայեք, թե ինչ ծիծաղելի գումարներ են նախատեսում կամ վճարում հանքահեններն այս նպատակներով Հայաստանում ու կհասկանաք, թե ինչ խայտառակ վիճակում ենք գտնվում մենք՝ որպես պետություն և նրա քաղաքացիներ։ Այս վիճակն ուղղակի անթույլատրելի է ու լրջագույն փոփոխությունների կարիք կա Հայաստանում»։