Երևան`   +7 °C
Այսօր`   Երեքշաբթի, 17 նոյեմբերի, 2026 թ.

Հանքավայրեր շահագործողները կոպտորեն խախտում են օրենքները, բայց պատժվում ձևական տուգանքներով․ ՀԲՃ

1086
Հինգշաբթի, 23 հուլիսի, 2020 թ., 04:10
Հանքավայրեր շահագործողները կոպտորեն խախտում են օրենքները, բայց պատժվում ձևական տուգանքներով․ ՀԲՃ

Հայկական բնապահպանական ճակատ (ՀԲՃ) նախաձեռնության ֆեյսբուքյան էջում հաղորդագրություն է տարածվել. «Քաջարանի հանքավայրի շահագործման ընթացքում թույլ տրված ակնհայտ իրավախախտումների վերաբերյալ դեռ 2017-ին բացահայտած մեր փաստերը ներկայացրել էինք նաև ԱԺ պատգամավորներին։ «Իմ քայլը» խմբակցությունը դրանք փոխանցել էր Բնապահպանության և ընդերքի տեսչական մարմնին, որտեղից ստացել ենք պատասխանը, որից պարզ է դառնում, որ Հայաստանում կարելի է ընդերքօգտագործման պայմանագրերով ու բնապահպանական փորձաքննության եզրակացություններով թույլատրվածից 20-30 միլիոն տոննա ավել հանքաքար արդյունահանել և դրա հետևանքով տուգանվել ընդամենը 150 000 դրամ։

Սա ուղղակի ծաղր է բնության, պետության, օրենքների և ՀՀ քաղաքացիներին պատկանող ընդերքի պաշարների նկատմամբ։ Բացի այդ անհասկանալի է, թե ինչո՞ւ է տեսչական մարմինն ընտրել ու կիրառել հենց այս պատժամիջոցը, երբ Ընդերքի մասին օրենսգրքում և Շրջակա միջավայրի վրա ազդեցության գնահատման և փորձաքննության մասին ՀՀ օրենքում կան ավելի լուրջ հոդվածներ այս խախտումնների վերաբերյալ ու դրանց համար նախատեսված են լրիվ այլ ու շատ ավելի խիստ պատժամիջոցներ։ Ի վերջո, եթե մենք ունենք այսպիսի թույլ օրենսդրություն, ապա պետք է օր առաջ վերանայել միայն հանքատերերի շահերի սպասարկմանը միտված օրենսդրությունը։

Կարծում ենք, որ այս փաստերն ևս մեկ անգամ անուղղակի հաստատում են, որ հանքարդյունահանման ոլորտը գտնվել և գտնվում է հովանավորչության ներքո կամ խնդիրները լուծվել ու լուծվում են կոռուպցիոն ճանապարհներով։ Քանի որ այս դեպքն ամենևին էլ եզակի չէ՝ դիմում ենք ԱԺ «Իմ քայլը» խմբակցության պատգամավորներին քննարկում կազմակերպել այս և մյուս դեպքերի վերաբերյալ ու պատրաստ ենք ներկայացնել հանքերի վերաբերյալ մեր ունեցած բոլոր փաստերն ու իրավական հիմնավորումները»։