«Քննարկման փուլում է». Երևանի փոխքաղաքապետը՝ մանկապարտեզների աշխատակիցներին վճարելու մասին

Այս օրերին դժվարին կացության առջև են հայտնվել նախադպրոցական հաստատությունների այն աշխատակիցները, ովքեր պայմանագրային հիմունքներով են աշխատել. նրանց հետ կնքված աշխատանքային պայմանագրերը չեն խզվել, սակայն չեն կարողանում օգտվել կառավարության առաջարկած աջակցության ծրագրերից:
Երևանի քաղաքապետի տեղակալ Տիգրան Վիրաբյանը մամուլի ասուլիսում ասաց, որ հարցը քննարկվել է:
«Այն աշխատողները, ովքեր քաղաքապետարանի ենթակայության մանկապարտեզներում ծառայության մատուցման պայմանագրեր են կնքել, չեն կարողացել քաղաքապետարանի բյուջեով աշխատավարձ ստանալ, որովհետև հաստիքացուցակում չկան: Մենք բոլոր աշխատակիցների անուն-ազգանունները փոխանցել ենք կառավարությանը: Հիմա քննարկման փուլում է, թե ինչ միջոցներով հնարավոր կլինի այդ աշխատակիցներին օժանդակել կամ վճարել նրանց աշխատավարձը»,- նշեց փոխքաղաքապետը: