Երևան`   +6 °C
Այսօր`   Երեքշաբթի, 17 նոյեմբերի, 2026 թ.

Հայտնի են արագ շախմատի աշխարհի չեմպիոնն ու չեմպիոնուհին

353
Շաբաթ, 29 դեկտեմբերի, 2018 թ., 02:50
Հայտնի են արագ շախմատի աշխարհի չեմպիոնն ու չեմպիոնուհին

Սանկտ-Պետերբուրգում ավարտվեց արագ շախմատի աշխարհի առաջնությունը: 15 հնարավորից վաստակելով 11 միավոր՝ աշխարհի չեմպիոն հռչակվեց Ռուսաստանը ներկայացնող գրոսմայստեր Դանիիլ Դուբովը: Այսօր Մագնուս Կարլսենը նշել էր, որ աշխարհի չեմպիոնի կոչման մրցախաղի ընթացքում Դուբովը հանդիսացել է իր մարտավկան: 4 շախմատիստ՝ Շահրիյար Մամեդյարովը, Հիկարու Նակամուրան, Վլադիսլավ Արտեմևը և Մագնուս Կարլսենը, վաստակեցին 10,5-ական միավոր և կիսեցին 2-5-րդ տեղերը: Լրացուցիչ ցուցանիշների հաշվարկից հետո Մամեդյարովը գրավեց 2-րդ հորիզոնականը, Նակամուրան՝ 3-րդ: Մագնուս Կարլսենը դարձավ 5-րդը: Մեր մասնակիցներից հաջող հանդես եկավ Տիգրան Պետրոսյանը, ով վաստակեց 10 միավոր և գրավեց 10-րդ հորիզոնականը:

Գաբրիել Սարգսյանը իր ակտիվում գրանցեց 9 միավոր և գրավեց 31-րդ հորիզոնականը:
Մրցաշարը ամբողջովին ձախողվեց հայկական շախմատի առաջատար Լևոն Արոնյանի համար, ով վաստակեց միայն 7.5 միավոր:

Կանանց պայքարում 12 հնարավորից վաստակելով 10 միավոր՝ արագ շախմատի չեմպիոնի տիտղոսը նվաճեց դասական շախմատի աշխարհի չեմպիոն, Չինաստանի ներկայացուցիչ Ցզյու Վենցզյունը:

Հիշեցնենք, որ տարեսկզբին Վենցզյունը դարձել էր կանանց աշխարհի չեմպիոն, իսկ նոյեմբեր ամսին նոկաուտ համակարգով անցկացված աշխարհի առաջնությունում պահպանել էր տիտղոսը:

2 շախմատիստուհի՝ Իրանի ներկայացուցիչ Սարասադատ Խադելմալսարեհը և Ռուսասանը ներկայացնող Ալեքսանդրա Գորյաչկինան, վաստակեցին 9-ական միավոր և կիսեցին 2-3-րդ հորիզոնականները: Ավելի բարձր լրացուցիչ ցուցանիշների շնորհիվ Խադեմալսարեհը դարձավ փոխչեմպիոն, իսկ Գորյաչկինան բավարարվեց բրոնզե մեդալով:

Մեր մասնակիցներից Լիլիթ Մկրտչյանը և Էլինա Դանիելյանը վաստակեցին 6-ական, իսկ Մարիա Գևորգյանը՝ 4.5 միավոր: Նրանք համապատասխանաբար զբաղեցրեցին 64, 66 և 106-րդ տեղերը:

Դեկտեմբերի 29-ին և 30-ին կկայանա կայծակնային շախմատի առաջնությունը: