Մեծ Բրիտանիայի վարչապետը խոտովանել է՝ մեկ բաժակ վիսկին օգնել է ուշքի գալ

Մեծ Բրիտանիայի վարչապետ Թերեզա Մեյը պատմել է, որ մեկ բաժակ վիսկին օգնել է իրեն ուշքի գալ՝ Brexit-ի հարցով 5 ժամ տևած քննարկումներից հետո, հաղորդում է Daily Mail-ը:
Թերեզա Մեյի խոսքով՝ իրեն մեծ աջակցություն է ցուցաբերել ամուսինը՝ Ֆիլիպը, որը իրեն ալկոհոլ է հյուրասիրել:
«Վերջին օրերին դժվար է եղել: Երբ ես չորեքշաբթի երեկոյան՝ ժամը 11:00-ին, տուն եկա, առաջին բանը, որ Ֆիլիպն արեց, ինձ վալլիական Penderyn վիսկիով հյուրասիրելն էր»,- պատմել է վարչապետը:

Հիշեցնենք, որ խորհրդակցություններն ավարտվել են Թերեզա Մեյի հաղթանակով. նրան հաջողվել է նախարարների մեծամասնությանը ստիպել ընդունել փաստաթուղթը: Չնայած դրան՝ 3 նախարար հրաժարական է տվել: Հայտնի է դարձել նաև, որ կուսակիցները մտադիր են Մեյին պաշտոնանկ անելու գործընթաց սկսել:

Մեծ Բրիտանիայի վարչապետը չի հստակեցրել, թե ինչ քանակությամբ ալկոհոլ է խմել այդ օրը: Նա նշել է, որ հաջորդ օրն առավոտյան իրեն նոր դժվարություններ էին սպասում, երբ զանգեցին և հայտնեցին Brexit-ի հարցերով զբաղվող նախարար Դոմինիկ Ռաաբի հրաժարականի մասին: