Ծանրամարտ. Գոռ Սահակյանը՝ պատանիների Եվրոպայի չեմպիոն

Իտալիայի Միլան քաղաքում մեկնարկած ծանրամարտի պատանիների Եվրոպայի առաջնության շրջանակներում այսօր մրցահարթակ դուրս եկան 50 կգ քաշային մինչև 15 և մինչև 17 տարեկան ծանրորդները։ Այս քաշային կարգում Հայաստանը մինչև 15 տարեկանների պայքարում ներկայացնող Գոռ Սահակյանը հռչակվեց Եվրոպայի չեմպիոն: Գոռը, պոկելով 80 կգ և հրելով 98 կգ, երկամարտում գրանցեց 178 կգ արդյունք: Մեր մյուս ներկայացուցիչը՝ Ժորա Սարգսյանը, չկարողացավ գլխավերևում պահել 80 կգ կշռող ծանրաձողը և պոկում վարժությունից ստացավ 0։ Նա պայքարը շարունակեց հրում վարժությունում և, գրանցած 90 կգ արդյունքով, պայքարն այս վարժությունում ավարտեց 7-րդ տեղում։ Մինչև 17 տարեկանների պայքարում Անդրանիկ Պապեյանը չկարողացավ պայքարել մեդալների համար՝ ձախողելով 6 մոտեցումներից 4-ը։ Անդրանիկը, պոկելով 80 կգ և հրելով 100 կգ, երկամարտի 180 կգ, զբաղեցրեց 4-րդ տեղը։