«Այժմ հանգիստ արթնանում եմ և որոշում՝ ինչպես անցկացնել ժամանակս, ես ինձ ազատ եմ զգում». Օբաման հարցազրույց է տվել արքայազն Հարիին

ԱՄՆ նախկին նախագահ Բարաք Օբաման հարցազրույց է տվել Մեծ Բրիտանիայի արքայազն Հարիին: Հարցազրույցը հրապարակվել է այսօր: Օբաման պատմել է, որ նախագահի պաշտոնը լքելուց հետո հնարավորություն ունի լիարժեք քնել և վերահսկել իր օրը:

«Ես ուշ եմ արթնանում: Եվ, իհարկե, հրաշալի է հնարավորություն ունենալ վերահսկել օրդ: Ես այդ հնարավորությունը չունեի, երբ նախագահ էի: Այդ ժամանակ ես խիտ աշխատանքային ժամանակացույց ունեի: Այժմ ես արթնանում եմ, որոշում, թե ինչպես պետք է անցկացնեմ օրս և թե ինչ պետք է անեմ: Ես ինձ ազատ եմ զգում: Ես հնարավորություն ունեմ խորհել ինչ-որ հարցերի շուրջ»,- BBC-ն մեջբերում է Օբամայի խոսքը:

Նա նաև պատմել է, որ արթնանալուց հետո հնարավորություն ունի 45 րոպե շփվել կնոջ հետ, ապա նախաճաշ պատրաստել և միայն հետո անցնել աշխատանքի: Միևնույն ժամանակ, նա նշել է, որ շարունակում է մտածել իր երկրի և քաղաքացիների ապագայի մասին:

Հարիի հետ զրույցում ԱՄՆ նախկին նախագահը խոստովանել է, որ կարոտում է նախագահի պաշտոնում իր աշխատանքը:

«Ամենից շատ կարոտում եմ իմ թիմը, ակտիվ աշխատանքը, երբ գիտեիր, որ ամեն օր ինչ-որ հարցեր ես լուծում մարդկանց համար: Եվ, իհարկե, կարոտում եմ նախագահի պաշտոնում իմ աշխատանքը»,- ասել է Օբաման: