«Թրամփը մարդասիրական նկատառումներից ելնելով՝ հատուկ ուշադրություն է դարձնում ուկրաինական հարցին»․ Պուտին

ԱՄՆ նախագահ Դոնալդ Թրամփը հատուկ ուշադրություն է դարձնում ուկրաինական հարցին՝ առաջին հերթին մարդասիրական նկատառումներից ելնելով։ Այս մասին հայտարարել է ՌԴ նախագահ Վլադիմիր Պուտինը՝ ԱՄՆ նախագահի հատուկ բանագնաց Սթիվ Ուիթքոֆի հետ հանդիպման ընթացքում։

«Ցանկանում եմ շնորհակալություն հայտնել ձեզ և նախագահ Թրամփին՝ Ուկրաինայում ճգնաժամի կարգավորման խնդիրներին ուշադրություն դարձնելու համար։ Գիտեմ, որ նախագահ Թրամփը հատուկ ուշադրություն է դարձնում այս հարցին՝ առաջին հերթին մարդասիրական նկատառումներից ելնելով», — ասել է Ռուսաստանի նախագահը։

«Մեր զրույցների ընթացքում, այդ թվում՝ վերջին հեռախոսազրույցի ժամանակ, նա ընդգծել է, որ անհրաժեշտ է դադարեցնել այս հակամարտությունը՝ առաջին հերթին նկատի ունենալով երկու կողմերի անձնակազմի կորուստները։ Բայց խոսքը, իհարկե, միայն զինծառայողների կորուստների մասին չէ, այլև խաղաղ բնակչության տառապանքների», - հավելել է Պուտինը։