Հեգսեթը չի բացառում Իրանի դեմ հարվածները վերսկսելու հնարավորությունը

ԱՄՆ-ն չի բացառում Իրանի դեմ հարվածները վերսկսելու հնարավորությունը, սակայն ելնում է այն հանգամանքից, որ այժմ Թեհրանին «ամենից շատ» վնասում է տնտեսական ճնշումը։ Այս մասին հայտարարել է ԱՄՆ պատերազմի նախարար Փիթ Հեգսեթը։

Վիսկոնսին նահանգի Օշքոշ քաղաքում լրագրողների հետ զրույցում նա բացասական պատասխան է տվել այն հարցին, թե արդյոք պետք է իրավիճակը հասկանալ այնպես, որ ամերիկյան հարվածները Իրանին այժմ «դադարեցված են»։ «Ո՛չ։ Եթե մեզ անհրաժեշտ լինեն կինետիկ հարվածներ, մենք դրանք կհասցնենք։ Եթե Իրանն այնքան անխոհեմ գտնվի, որ գերագնահատի իր հնարավորությունները կամ առճակատման մեջ մտնի ԱՄՆ զինված ուժերի հետ, ապա մենք կանենք այն, ինչ անհրաժեշտ է»,- ասել է Փենթագոնի ղեկավարը։

«Սակայն մենք գիտենք, որ այժմ նրանց ամենից շատ վնասում է տնտեսական ճնշումը։ Թեև մենք ոչ մի կերպ չենք հրաժարվում Հորմուզի նեղուցում կամ Իրանի շրջակայքում որևէ վայրի ուղղությամբ հարվածներ հասցնելու հնարավորությունից»,- հավելել է Հեգսեթը։ Նրա կարծիքով՝ Իրանի ունեցած «միակ ընտրությունը» միջուկային ծրագրի շուրջ բանակցություններ վարելն է, ինչը պահանջում է ԱՄՆ նախագահ Դոնալդ Թրամփը։