Արարատի ստորոտին հայտնաբերվել են Նոյան տապանի աստվածաշնչյան նկարագրությանը համապատասխանող ստորգետնյա սրահներ

Արարատ լեռան հարևանությամբ գտնվող Դուրուփինարի բնական կազմավորման շուրջ իրականացվող հետազոտությունները սենսացիոն ընթացք են ստացել: Ամերիկացի հետազոտողների խումբը՝ Էնդրյու Ջոնսի գլխավորությամբ, հայտարարել է ստորգետնյա անցումների և սրահների ցանցի հայտնաբերման մասին: Ըստ նրանց՝ գտածոն զարմանալիորեն համապատասխանում է Նոյյան տապանի ներքին կառուցվածքին: Գրունտի խորքային զոնդավորման ռադարների (GPR) միջոցով գիտնականներին հաջողվել է հողի հաստ շերտի տակ տեսնել կանոնավոր կառուցվածքներ, որոնք հիշեցնում են տապանի հարկերն ու խցերը:

Հետազոտողների պնդմամբ՝ հայտնաբերված սրահները պատահական բնույթ չեն կրում. դրանք ձևավորում են որոշակի համակարգ և տանում դեպի մի կենտրոնական հատված: Ինֆրակարմիր թերմոգրաֆիայի միջոցով ստացված տվյալները ևս հաստատում են հողի տակ նավի իրանի նմանվող կառույցի առկայությունը: Ըստ Ծննդոց գրքի՝ տապանը պետք է ունենար երեք հարկ և բաժանված լիներ առանձին սենյակների՝ Նոյի ընտանիքի և կենդանիների համար: Ջոնսի խումբը 6 մետր խորության վրա հայտնաբերել է երկրաչափական ճշգրիտ պատկերներ, որոնք կարող են լինել հենց այդ աստվածաշնչյան հարկերի մնացորդները:

Լրացուցիչ փորձաքննությունը ցույց է տվել, որ տվյալ տարածքի հողի մեջ կալիումի մակարդակը չափազանց բարձր է, ինչը բնորոշ է մեծաքանակ քայքայված փայտանյութի առկայությանը:

Թեև գիտական աշխարհի մի մասը շարունակում է պնդել, որ Դուրուփինարը զուտ բնական երկրաբանական երևույթ է, հետազոտողները վստահ են՝ հայտնաբերված կառուցվածքները մարդու ձեռքի գործ են: Հաջորդ փուլում նախատեսվում է իրականացնել խորքային հորատում, որպեսզի տեսախցիկների միջոցով վերջնականապես պարզվի՝ արդյո՞ք այս ստորգետնյա սրահները հազարամյակներ առաջ ապաստան են տվել մարդկությանը մեծ ջրհեղեղի ժամանակ: