«Իրանը պատվիրակություն կուղարկի Իսլամաբադ, եթե ԱՄՆ-ից դրական ազդանշան լինի»․ Ազիզի

Իրանը բանակցային խումբ կուղարկի Իսլամաբադ՝ մասնակցելու ԱՄՆ-ի հետ հրադադարի ավարտից առաջ բանակցությունների նոր փուլին, եթե ամերիկացիներից ստանա դրական ազդանշան։ Այս մասին Al Jazeera-ին հայտնել է Իրանի խորհրդարանի ազգային անվտանգության և արտաքին քաղաքականության հարցերի հանձնաժողովի ղեկավար Էբրահիմ Ազիզին։

«Մենք երբեք չենք վախեցել բանակցությունների սկզբունքից։ Հնարավոր է՝ այսօր կամ վաղը, հետագա գնահատումից հետո, մենք դա հավանական համարենք, պայմանով, որ ամերիկյան բանակցային խումբը և այն հաղորդագրությունները, որոնք նրանք ստացել են Իրանից, կտան դրական ազդանշան»,- ասել է նա։

Ավելի վաղ ԱՄՆ նախագահ Դոնալդ Թրամփը հայտնել էր, որ իր ներկայացուցիչները մեկնում են Իսլամաբադ՝ Իրանի հարցով բանակցությունների: ՄԱԿ-ում ԱՄՆ դեսպան Մայք Ուոլցը հայտնել էր, որ ԱՄՆ-Իրան բանակցությունները կվերսկսվեն առաջիկա 24 ժամվա ընթացքում, սակայն IRNA-ն հաղորդել էր, որ Իրանը հրաժարվել է մասնակցել բանակցությունների երկրորդ փուլին: