«Երևանի թեղիները հիվանդ են». քաղաքապետարան

Երևանի քաղաքապետարանը հոլովակ է տարածել՝ «Ինչու են Երևանում փոխարինվում ծառերը» վերնագրով: «Երևանի թեղիները հիվանդ են, ներսում՝ բնի մեջ, հազարավոր փոքրիկ որդեր են, որոնք սնունդ են քաշում ծառից՝ կամաց-կամաց թուլացնելով այն: Երբ ծառը կորցնում է դիմադրողականությունը, միջատների հարձակում է սկսվում: Վերջիններս ոչ միայն կերակրվում են տերևներով, այլև ներթափանցում են տներ՝ առաջացնելով ալերգիկ խնդիրներ: Հարց է հնչում՝ ինչո՞ւ չեք բուժում: Քիմիական բարձր չափաբաժիններով մշակումը նշանակում է թունավոր նյութեր. այն անվնաս չէ ու չի հանգեցնում ծեր ծառերի առողջացմանը»,- նշվում է հոլովակում: