«Անտարկտիդայի ափերի մոտ առաջին անգամ շնաձուկ են նկատել»․ #AP

Ավստրալացի գիտնականների խումբն առաջին անգամ շնաձուկ է նկատել Հարավային Շետլանդյան կղզիների մոտ՝ Անտարկտիկայի ջրերում: Այս մասին հայտնում է Associated Press (AP) գործակալությունը։

«Մենք չէինք սպասում այնտեղ շնաձկներ տեսնել, քանի որ կա կանոն, որ Անտարկտիկայում դրանք չկան»,- հայտարարել Է Արևմտյան Ավստրալիայի համալսարանի պրոֆեսոր Ալան Ջեյմիսոնը: Նրա խոսքով՝ շնաձկանը նկարահանել են հատուկ հետազոտական սարքի վրա տեղադրված տեսախցիկով՝ մոտ 490 մ խորության վրա, որտեղ ջրի ջերմաստիճանը 1․27 աստիճան Ցելսիուս է:

Շնաձկան երկարությունը, որը «դանդաղ լողում էր ամայի ծովի հատակով», գնահատվում է 3-4 մ: «Սա փոքր շնաձուկ չէ»,- նշել է պրոֆեսորը։ Նա ենթադրել է, որ Անտարկտիդայի ափերի մոտ կարող են բնակվել նաև այլ շնաձկներ, որոնք սնվում են ծովի հատակ իջնող կետերի և հսկա կաղամարների մնացորդներով։

Լրատվամիջոցը պարզաբանել է, որ շնաձուկը լուսանկարվել է դեռևս 2025 թվականի հունվարին, սակայն համալսարանը միայն հիմա է նկարները և տեղեկատվությունը հրապարակելու թույլտվություն տվել։

Գիտնականներին հայտնի են անտարկտիկական բևեռային շնաձկները, որոնք բնակվում են Խաղաղ, Հնդկական և Ատլանտյան օվկիանոսների հարավային հատվածներում՝ Ավստրալիայի, Նոր Զելանդիայի և Հարավաֆրիկյան Հանրապետության ափերի մոտ։