«Լավ է, երբ գերտերության առաջնորդը ջերմ հարաբերություններ ունի ՀՀ ղեկավարի հետ»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Երեկ լրահոսը, սոցիալական ցանցերը, վստահ եմ նաև՝ այսօր, ողողված էին ԱՄՆ նախագահի և ՀՀ վարչապետի համատեղ նկարներով:
Անկասկած, լավ է, երբ աշխարհի, կարելի է ասել միակ գերտերության առաջնորդը ջերմ հարաբերություններ ունի Հայաստանի ղեկավարի հետ՝ անկախ նրանից, թե ինչպես ենք մենք կամ այլք վերաբերվում Դոնալդ Թրամփին կամ Նիկոլ Փաշինյանին:
Քարոզչությունը, հակաքարոզչությունը, մանիպուլյացիան ու պոպուլիզմը չարորակ քաղցկեղի նման տարածվում են հայկական իրականության մեջ՝ ամենավերին էշելոններից մինչև պարզ օգտատերեր:
Մեր երկրի շահի տեսանկյունից շատ օգտակար է, երբ երկրի ղեկավարը և նախորդ ղեկավարները բարեկամական, կառուցողական հարաբերություններ ունենան և ունենային այն պետությունների ղեկավարների հետ, որոնք աշխարհակարգի վրա ունեն լուրջ ազդեցություն:
Սարսափելի չարացել ենք: Սա նորություն չէ, պարզապես մասշտաբներն են այլ:
Եթե չեմ սխալվում 1999 թվականին, կարող է տարին շփոթեմ, կներեք, «Հայկական ժամանակ»-ի առաջին էջում տեղադրված էր ՆԱՏՕ-ի բարձր մակարդակի հանդիպման լուսանկար, որտեղ ՀՀ երկրորդ նախագահ Ռոբերտ Քոչարյանը կանգնած էր ԱՄՆ նախագահ Քլինթոնի կողքին: ՀԺ-ն ծաղրանքով գրել էր, որ լուսանկարիչը հավանաբար Վարդան Օսկանյանն է եղել»: