«Պետք է մշակել սցենարներ, թե Իրանում պատերազմի դեպքում ինչպես պիտի վարվի ՀՀ-ն»․ Վահագն Սարոյան

Ռազմական փորձագետ Վահագն Սարոյանը ֆեյսբուքյան էջում գրում է․ «Տևական ժամանակ է, ինչ մեր հարևան Իրանում լարված իրադրությունը հաջորդում է մեկը մյուսին և դրանցից յուրաքանչյուրը կարող է լուրջ ռիսկային ազդեցություն ունենալ նաև մեզ վրա։ Այս շարունակական խառնաշփոթի պայմաններում գրեթե որևէ հստակ տեղեկություն չունենք Իրանում բնակվող հայերի անվտանգության ու վիճակի մասին։
Իրանում թե՛ պատերազմի, թե՛ իշխանափոխության սցենարները մեզ համար հավասարապես վտանգավոր են։ Բայց հենց այն պահին, երբ ամբողջ տարածաշրջանը կանգնած է ծանր փորձության առաջ, Հայաստանի իշխանությունը զբաղված է Հայ Առաքելական Սուրբ Եկեղեցու դեմ քաղաքական արշավով։
Այս օրերին պետք է գումարվեր Անվտանգության խորհրդի արտահերթ նիստ, կատարվեր ռիսկերի համապարփակ գնահատում՝ սկսած սահմանային անցակետերից մինչև դիվանագիտական ու տնտեսական ոլորտներ։ Պետք էր մշակել հստակ սցենարներ՝ պատերազմի դեպքում Հայաստանը ինչպես պիտի վարվի, ինչ քայլեր պիտի արվեն այսօր, վաղը, հաջորդ շաբաթ։
Փոխարենը՝ էներգիան ու ժամանակը ծախսվում են Եկեղեցուն ասպատակելու վրա։ Սա պետական անլրջություն է վտանգավոր ժամանակներում»: