Սիրիական բանակը հրետակոծում է քրդական դիրքերը Հալեպի արևելքում. Rudaw

Սիրիական անցումային կառավարության զորքերը հրետանային կրակ են բացել Եփրատ գետի վրա գտնվող Դեյր Հաֆեր քաղաքի ծայրամասում, որը ծառայում է՝ որպես քրդական ուժերի հենակետ: Rudaw-ի փոխանցմամբ՝ հրետակոծությունն սկսվել է այն բանից հետո, երբ սիրիական բանակը տարածքը հայտարարել է փակ ռազմական գոտի:

Հեռուստաալիքի փոխանցմամբ՝ հրետանային հարվածները վնասել են Ումմ ալ-Թինա շրջանի կամուրջներից մեկը, որն օգտագործվում է Հալեպից փախչող քուրդ փախստականներին Ռաքքա և Հասաքա հյուսիսարևելյան նահանգներ տեղափոխելու համար:

Միևնույն ժամանակ, սիրիական զինվորական խոսնակը հայտարարել է, որ Դեյր Հաֆերի ծայրամասերի հրետակոծությունը պատասխան է եղել քրդական անօդաչու թռչող սարքերի հարձակմանը Համիմա քաղաքի վրա, որտեղ տեղակայված են կառավարական ուժերը:

Ավելի վաղ «Սիրիական ժողովրդավարական ուժեր» քրդական կոալիցիայի հրամանատար Մազլում Աբդին հայտնել է, որ միջազգային միջնորդների օգնությամբ հունվարի 10-ին Հալեպում հրադադարի համաձայնագիր է կնքվել, որը երաշխավորում է բնակիչների և աշխարհազորայինների անվտանգ տարհանումը քրդական Աշրաֆիա և Շեյխ Մաքսուդ շրջաններից, որոնք դարձել են սիրիական զորքերի հետ կատաղի բախումների վայր: