Դադարեցվել է Կապսի ջրամբարի շինարարությունը

Շուրջ տասը օր է՝ դադարեցված են Շիրակի մարզի Կապսի ջրամբարի շինաշխատանքները։ Այս մասին Factor.am-ին տեղեկացրել է աշխատակիցներից մեկը՝ նշելով, որ իրեն և մյուս աշխատակիցներին բանավոր տեղեկացրել են այլևս աշխատանքի չներկայանալ։

Կառուցապատող ընկերության հետ Տարածքային կառավարման և ենթակառուցվածքների նախարարությունը պայմանագիրը լուծարելու գործընթաց է սկսել։ Տեղեկությունը հաստատել է նաև ՏԿԵ նախարարության մամուլի խոսնակ Սոնա Հարությունյանը։ «Մեկնարկել է պայմանագրի լուծարման գործընթաց նախարարության նախաձեռնությամբ։ Պայմանագրի ժամկետները խախտվել են, նախատեսված աշխատանքները գրաֆիկի համաձայն չեն կատարվել։ Այս պահի դրությամբ 16 տոկոսն է կատարվել աշխատանքների»,- ասաց Սոնա Հարությունյանը։

Շինաշխատանքներն իրականացնում էր չինական «Շանսի Քոնսթրաքշն Ինվեսթմենթ Գրուպ»-ը։ Նախատեսվում էր աշխատանքներն ավարտել 2026-ի ապրիլին։ Ջրամբարի շինարարության համար գերմանական KfW բանկը 68.5 մլն եվրոյի վարկ է տրամադրել, ևս 26.7 մլն եվրո էլ հատկացրել է Հայաստանի կառավարությունը։