«Ապահովագրական փաթեթները կակտիվանան հունվարի 1-ից». Անահիտ Ավանեսյան

ԱԺ առողջապահության հարցերի մշտական հանձնաժողովն արտահերթ նիստում երկրորդ ընթերցմամբ քննարկել և դրական եզրակացություն է տվել «Առողջության համընդհանուր ապահովագրության մասին» օրենքի նախագծին և կից օրենսդրական փաթեթին:

ՀՀ առողջապահության նախարար Անահիտ Ավանեսյանը հայտնել է, որ առաջին ընթերցմամբ ընդունվելուց հետո փաթեթում կատարվել են բովանդակային և խմբագրական որոշ փոփոխություններ:

Առաջարկներ ներկայացրել են պատգամավորները և Կառավարությունը: Ընդունվել են ոչ բոլոր առաջարկները:

Մասնավորապես, փոփոխվել է օրենքի՝ ուժի մեջ մտնելու ժամկետը: Ըստ այդմ՝ ընդունվելուց հետո այն ուժի մեջ կմտնի ստորագրվելուց հետո՝ հաջորդ օրը:

Նշվել է, որ ապահովագրավճար վճարողների համար առաջին հաշվարկային ամիս կդիտարկվի նոյեմբերը, քանի որ դեկտեմբերն աշխատավարձերի և պարգեւավճարների հավելյալ հաշվարկների առումով շեղող ամիս է:

Նախարարի խոսքով փաթեթները կակտիվանան հունվարի 1-ից, բայց վճարման ամսաթիվը կլինի մինչև հունվարի 20-ը:

Օրենսդրական փաթեթը կքննարկվի դեկտեմբերի 16-ին Կառավարության նախաձեռնությամբ գումարվելիք Ազգային ժողովի արտահերթ նիստում: Այս մասին տեղեկացնում է ԱԺ կայքը: