«Ցանկացած սխալ էտ կամ ծառերի հատում ուղիղ կապ ունի օդի վտանգների հետ»․ Քրիստինա Վարդանյան

Երևանի ավագանու անդամ Քրիստինա Վարդանյանի ֆեյսբուքյան գրառումը՝ կից լուսանկարներով․ «5 օրից ձմեռ է, իսկ ծառերը դեռ մեզ պաշտպանում են շրջակա միջավայրի ռիսկերից։ Ո՞ր ծառերն են դեռ տերևներով՝ թեղիները, սոսիները, կաղնիներն ու սոֆորաները, ճիշտ այն ծառերը, որոնք խորհրդային տարիներին տնկվել են Երևանի փողոցներում։ Ամենածառան՝ թեղին է, քանզի առաջինն է տերևը բացում։
․ Երևանի համար ծառերի տերևները բնական ֆիլտր են, որոնք ուղղակիորեն կապված է օդի որակի և առողջական ռիսկերի հետ։ Երբ տերևների քանակը կամ ծառերի առողջությունը նվազում է, վտանգներն արագորեն աճում են։
․ Տերևների մակերեսը նստեցնում է Երևանի ամենալուրջ օդի աղտոտիչ՝ PM2.5 և PM10 մասնիկների զգալի մասը։ Եթե ծառերը հատվում կամ վնասվում են (տոպինգ, անկանոն էտ), տերևային մակերեսը նվազում է՝ օդում պտտվող փոշին շատանում է և վնասում բոլորիս։ Երևանի կենտրոնում, որտեղ ճանապարհային երթևեկությունը շատ խիտ է, սա միանգամից արտահայտվում է աղտոտման բարձր ցուցանիշներով։
․ Երբ խոշոր, հաստաբուն ծառերը հատվում կամ խոր էտ է արվում, դրանց փոխարեն տնկված փոքրիկ ծառերը տարիներ շարունակ չեն ունենալու բավարար տերևային զանգված՝ բացակայելու է էկոծառայությունը։ Հինգ տարեկան երեխան դեռ երկար տարիներ չի կարող պետությանը բարիք տալ, նույն սկզբունքն է։ Այս ընթացքում քաղաքը մնալու է ռիսկային «անցումային շրջանում», երբ օդի մաքրման բնական կարողությունը զգալիորեն նվազում է։ Ի դեպ, Երևանում 5 անգամ պակաս է ընդհանուր օգտագործման կանաչ տարածքների ցուցանիշը։
․ Առողջ, կանաչ տերևները իրականում «աշխատում» են․
դրանք կլանում են գազերը և մասնակցում են օդի բնական մաքրմանը։ Այս պատճառով էլ դրանք նվազեցնում են օդում ազոտի երկօքսիդի (NO₂) կուտակումը, թույլ չեն տալիս, որ հեշտ ձևավորվի օզոնը և նվազեցնում են ամռանը արևի ազդեցությամբ առաջացող քիմիական մառախուղը։
․ Ձմռանը ռիսկերն աճում են երկու պատճառով․
տերևների բացակայությամբ ֆիլտրը զրոյանում է,
ավելանում են վառարանները, ծուխը, այրվող թափոնները, տերևների այրումը, օդում «ծանր» մասնիկները օդում կախված են մնում։
․ Երևանում վտանգներն ավելանում են, երբ թուլանում է տերևային վահանը․

օդի որակը վատանում է ավելի արագ, քան եվրոպական քաղաքներում,

փոքր մասնիկները թափանցում են թոքերի խորը շերտեր,
դիօքսինների և այրման հետևանքով առաջացող թույների ազդեցությունը մեծանում է,
հղի կանանց, երեխաների, տարեցների համար ռիսկերը բազմապատկվում են։
․ Երևանի ծառերի տերևները քաղաքի ամենահզոր, անվճար և անփոխարինելի պաշտպաններն են օդի աղտոտման դեմ։ Ցանկացած սխալ էտ, տոպինգ, կամ ծառերի հատում ուղիղ կապ ունի քաղաքում օդի վտանգների աճի և հետևապես, բոլորիս կյանքի ու առողջության հետ»։