«Կովկասում չկա հաստատված խաղաղություն, կա շարունակվող պայքար»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Հաստատված խաղաղության շահառուն միայն Հայաստանն ու Ադրբեջանը չեն, այլ նաև Վրաստանն ու ամբողջ ռեգիոնը: Թբիլիսի այցի և այդ ընթացքում Վրաստանի նախագահի հետ հանդիպմանը ասում է Հայաստանի արտգործնախարարը:

Ինչպե՞ս է սրան վերաբերելու Վրաստանի իշխանությունը, որը անկասկած լսում է նաև Ադրբեջանի նախագահին, ու թերևս հասկանում պարզ բանը՝ որ խաղաղություն հաստատված չէ, և որ՝ Արարատ Միրզոյանը Վրաստանում խոսում է պարզապես Հայաստանում ձևավորված նախընտրական քարոզչական «պարադիգմի» համատեքստում:

Պաշտոնական Երևանը այդպես էլ որևէ կերպ չի արձագանքել Ռուսաստանի ԱԽ քարտուղար Շոյգուի այն հայտարարությանը, որ օրեր առաջ հնչեց Մոսկվայում՝ ԱՊՀ երկրների ԱԽ քարտուղարների հավաքի օրերին: Շոյգուն հայտարարել էր, որ հայ-ադրբեջանական հակամարտությունը կարգավորված չէ:

Դրանից մի քանի օր անց Էրդողանն էր խոսել, թե պետք է շարունակել կարգավորմանն ուղղված ջանքը: Այլ կերպ ասած՝ Էրդողանն էլ խոսել էր, որ կարգավորված չէ:

Երևանից ոչ մի արձագանք: Մինչդեռ, այդ հայտարարությունները ուղիղ հակասության մեջ են պաշտոնական Երևանի այն պնդումներին՝ ընդհուպ վարչապետի մակարդակով, թե քաղաքական առումով հարցը լուծված է և իբրև թե մնում են երեք տասնամյակի կոնֆլիկտի սոցիալ-հոգեբանական «մետաստազները»:

Այդ ֆոնին, գնալ Վրաստան և ասել, թե «հաստատված խաղաղության շահառուն» նաև Վրաստանն է, հազիվ թե կարող է լուրջ ընկալվել հենց Վրաստանում:

Այդ իմաստով, ավելի կարևոր էր իհարկե Վրաստանի վարչապետ Կոբախիձեի հետ հանդիպմանը Հայաստանի և Վրաստանի տարանցիկ հնարավորությունների օգտագործելիությունը բարձրացնելու մասին խոսակցությունը, եթե այն իհարկե եղել է առարկայական, այլ ոչ թե արարողակարգային:

Կովկասում չկա հաստատված խաղաղություն, կա շարունակվող պայքար ռեգիոնում աշխարհաքաղաքական ազդեցության այս կամ այն ռեժիմ հաստատելու համար: Իսկ այստեղ Վրաստանն ու Հայաստանն ունեն ընդհանուր շահեր, իհարկե թե՛ կայունության ռեժիմի շարունակությունը ապահովելու տեսանկյունից, թե՛ նաև Կովկասի տնտեսա-քաղաքական և անվտանգային նոր ճարտարապետության հարցում օրակարգային սխեմաների ձևավորման»: