«Ասում է՝ դաշնակցականի ստորագրությամբ է Արցախը հանձնվել․ այս տղային դատի կտանք»․ Գոռ Սարգսյան

ՀՅԴ անդամ Գոռ Սարգսյանը ֆեյսբուքյան էջում հրապարակել է Էջմիածնի համայնքապետի թեկնածու Արգիշտի Մեխակյանի՝ Հանրայինին տված հարցազրույցից մի հատված՝ կից գրելով․ «Մի տարօրինակ տղա, որը հավակնում է դառնալ Վաղարշապատ խոշորացված համայնքի ղեկավար, հայտարարում է, թե Դաշնակցականի ստորագրությամբ է Արցախը հանձնվել։ Դե, գիտեք ինչպես է լինում․ երբ Ազգային ժողովի ամբիոնից Արցախը Ադրբեջանի կազմում ճանաչած մարդը հայտարարում է, որ իրենից շատ Արցախի համար ոչ ոք ոչինչ չի արել, բնական է, որ իր կուսակից այս տղան էլ Դաշնակցության մասին նման բան կասի՝ այն կուսակցության մասին, որը փաստացի ազգային ազատագրական պայքարը տարել է Արցախ։
Բնականաբար, այս տղան իր սխալը տղամարդավարի չի ընդունի, և քանի որ տղամարդավարի չի պահի իրեն, ես էլ չեմ գնալու ու ասեմ՝ սուտ ես խոսում, այ հակահայկական խմբակի անդամ։ Բայց մի բան չենք մոռանում՝ տղամարդավարի պահվածքը։
Այդ պատճառով էլ համապատասխան մեր հանձնախումբը այս տղային դատի կտա՝ Դաշնակցության մասին սուտ տեղեկատվություն տարածելու համար։
Հ.Գ. Իսկ ես ասում եմ՝ Նիկոլ Փաշինյանն է, որ հանձնել է Արցախը , նա այն ճանաչել է Ադրբեջանի կազմում, և ես պատասխանատվություն եմ կրում իմ ասածների համար, եթե պետք լինի՝ անգամ դատարանում։
Հ.Գ. Իսկ երբ Դաշնակցությունը կռվում էր Արցախի ազատագրման համար, Հայրդ էլ այդ նույն ճակատում էր՝ ոչ թե քո նման հանձնողների ճակատում։