«Փափուկ ուժի և թուրքական դիվանագիտության միջոցով թուրք-ազերիները Հայաստանը կգրավեն առանց պատերազմի». Արմենակ Դանիելյան

Երևանի ավագանու «Մայր Հայաստան» խմբակցության անդամ Արմենակ Դանիելյանի ֆեյսբուքյան գրառումը. «Նոյեմբերի 9 -ի եռակողմ փաստաթղթի 5 -րդ տարելիցի և Օգոստոսի 8 ֊ի եռակողմ փաստաթղթի 3 ամսյակին նվիրված մի բան հիշեցնեմ՝ մի քանի պայմանագիր նշեմ, որ կնքվել են վերջին 100 տարում և խախտվել են ու չեն ծառայել իրենց նպատակին։
• Բաթումի պայմանագիր - 1918 թ. Հունիսի 4
• Սեվրի պայմանագիր - 1920 թ. Օգոստոսի 10
• Ալեքսանդրապոլի պայմանագիր - 1920 թ. Դեկտեմբերի 2
• Մոսկվայի պայմանագիր - 1921 թ. Մարտի 16
• Կարսի պայմանագիր - 1921 թ. Հոկտեմբերի 13
• 1939թ. Օգոստոսի 23 -ին Մոսկվայում կնքված և ստորագրված ԽՍՀՄ-Գերմանական պայմանագիրը, որտեղ ամրագրված էր միմիանց վրա չհարձակվելու մասին կետը, սակայն 1941 թ. -ի հունիսի 22 ֊ին Գերմանիան այնուամենայնիվ հարձակվեց ԽՍՀՄ -ի վրա։
• 1994թ. -ի մայիսի 12 -ին կնքվեց Ադրբեջանի Հանրապետության, Հայաստանի Հանրապետության և Լեռնային Ղարաբաղի Հանրապետության միջև հրադադարի համաձայնագիր, որը Ադրբեջանը բազմաթիվ անգամներ խախտում էր, որի անպատժելիության պատճառով էլ եղան 2014թ. -ի օգոստոսյան դեպքերը, 2016թ. -ի ապրիլյան քառօրյան, 2020թ. -ի կործանարար 44 օրյա պատերազմը և 2023թ. ֊ի սեպտեմբերի Արցախի հայաթափումը։
Հիմա ինչ եմ ուզում ասեմ.
Կնքվելիք նոր փաստաթուղթը, որի անունը խաղաղության պայմանագիր է, իսկ իրականում կապիտուլացիոն փաստաթուղթ, հայերին զսպելու համար է, հային ռևանշի չգնալու մասին է։ Նաև չկա ոչ մի երաշխիք, որ Ադրբեջանը ինչ-որ պատճառաբանությամբ միակողմանի չի լուծարի պայմանագիրը և այս անգամ հարձակվի ՀՀ-ի վրա, իսկ պայմանագրի գործելու դեպքում փափուկ ուժի և թուրքական դիվանագիտության միջոցով թուրք-ազերիները Հայաստանը կգրավեն առանց պատերազմի՝ իրենց քաղաքականությամբ, իրենց տնտեսությամբ և իրենց ներկայությամբ կճնշեն ու դուրս կհանեն հայերին իրենց պապական ու պատմական գյուղերից ու քաղաքներից»: